( مسى الخير )

قصيده راقت لي فحبيت ان اطرحها لكم
واتمنى ان تروق ايضاً لكم

مسى الخير للي للقصيده مساء يقرون

والي يشوفه صبح اصبحه بالأنوار

مشتاق انا والله لكم كان ماتدرون

بس ابعدتني عنكم حكمة الاقدار

وهذا انا راجع لكم شاكر وممنون

ولكنني محرج على الغيبه ومحتار

بس اليوم انا قررت ابا ابوح بالمكنون

واعبر عن الي داخلي واكشف الاسرار

ابضرب على الكايد واجنب طريق الهون

ولاني مغبي شي والله مهما صار

منكر انا ماني بهادي انا مشحون

ياكن في صدري تواقد لهايب نار

ادوج وافتر وابترم كني المجنون

يالله تخفف عني الهم ياغفار

همي ماهو سبة غلا وموت في مزيون

و ماهو سبايب حب للريال ولدينار

همي على اخوانن لنا بسوريا يعانون

من الفرقه الي صارو اخطر من الكفار

على المدافع والقتل والفزع يصحون

والي ببيته فوق راسه تهــد الدار

ياجيش بشار اخبروني وش تسوون

لعنه عليكم والف لعنه على بشار

جرايم وذبح شضل ابسألك ياملعون

الله عسى مثواك يالطاغيه بالنار

والشام فيها رجال ذيابه ولا يخافون

وقت الشدايد ثابتين يحمون الديار

ياطاغيه لابد لابد ماتقعون

بعون الي اعمى قريش عن اللي اختبو بالغار

تحيه لأهل الشام اللي عاهدو يوفون

بالعهد اللي هو ايه للموت لا للعار

يأخواننا ندعيلكم والعرب يدعون

ندعي لكم بالنصر بالصبح والاسحار

اما هل القلطه واهل شاعر المليون

تكفون طلبه عنهم غضو الابصار

ماهمهم شيصير وعلى الطمع يمشون

واهل الفسق لابد تجيهم الادوار

ماعمهم والله بهم ناس يتمنون

من اجسادهم يبنو لأهل سوريا اسوار

اهم شي يأهل الشام تكفون لاتضنون

انا نسيناكم ترونا لكم انصار

وتأكدو به ناس والله ماينامون

يدعو لكم بالنصر من العالم الغفار

وختامها يالله ياللي تدير الكون

يامهلك الفجار يامكرم الابرار

يامنجين موسى واللي معه من فرعون

تعجل بنصر اخواننا وتهلك الفجار