على ذكرى فعل ماضي على خدي تهل دموع
فلا تنفع به السلوى ولا ينفع مضارعها
يصير اليوم في عمري حساباتي تقول اسبوع
تبين بوجه راعيها ولو يخفي مواجعها
الا ليت الامل يرجع بعد حبل الرجاء المقطوع
رياح البعد لا هبت فهل نقدر نجمعها ؟
اعزف الاه مقطوعه يغني به ألم مفجوع
على نوته من الفرقا مواويله مدامعها
انا والليل واشعاري وقلب ٍ بالالم موجوع
هواجيسي تداهمني على غفله واصارعها
ولو نبني من الحاضر على الماضي مية مشروع
يقوم اعصار في غفله اساساته يقلعها
سحايب حزن ماطرها اشوفه فالخلا منقوع
واشوف اسدود منهاره على قوة موانعها
واشوف اشجار محروقه على ارض ٍ بدون ازروع
يموت الطير من جوعه بعد ماتت مزارعها
انا وجدي وجد شايب راءَ ابنه تحت مصروع
تدوسه خيل عدوانه فلا يقدر يقارعها
اذا منه رقد ساعه تذكر ثم صحى مفزوع
ياكن الروح من جسمه تبي تطلع ينازعها
وراك اليوم ياحزني اذا جيتوا تجون اجموع
ياكن الحزن وهمومه على كبدي مراتعها
اخفي سالفة عمري فلا يبدي لحد موضوع
فلا تكتب عن القصه مع العالم مطابعها
واذا شفت ابتساماتي على وجهي .. ترا مطبوع ..
على قلبي حزن ليل ًَ يظلم في شوارعها
رجيت الله سبحانه يفرجلي هموم تزوع
على قلبي واذا غابت تناديلي طلايعها
ابى الجاء له وابى اخضع له وابى اسجدله وانا المصفوع
إلَه الناس وارزاقه على خلقه يوزعها
م /ن
العضو الأكثر نشاطاً هذا اليوم 
العرض الشجري
