كان الاباء والاجداد في اشعارهم يتحرون الصدق ويقولون الحقيقه حتى لو كانت
ضدهم لعلمهم ان الكذب منقصه على الرجل في حياته وبعد موته00
فهذا سعدون العواجي من شيوخ قبيلة عنزه يقول:
بالحال خص عقاب فكـاك الانشـاب=ينجيك كان انك عـن الحـق عديـت
قل شامخ شمخ بالمرجله عقب ماشاب=ياعقـاب والله ذللـونـي وذلـيـت [/poem]
فهذا شيخ ويعترف انه خاف وذل من ابن عمه شامخ اللي اغتنم كبر سنه وغياب
عياله0 في حين اننا نتعايب ان نعترف بالهزيمه ونحن من عوام الناس0
وهذا شالح بن هدلان من شيوخ قحطان بعد مقتل ابنه ذيب يقول:
خليتوا النـادر بـدار الاجانيـب=وضاقت بي الافاق عقب اتساعه
وتكدرت لي صافيات المشاريـب=وبالعون ذقت الذل عقب الشجاعه [/poem]
يعترف ايضا انه يشعر بالذل بعد مقتل ابنه وسنده ذيب00
وهذا غانم اللميع من الدهامشه من عنزه اثناء خلافهم مع محروت ابن هذال شيخ
عنزه(ابوزبن) وهو يهدده بالحرب والامور على اشدها فيقول:
ولا قلتها بك يابن فيصل سبابه=حسن وتدبير الولي فيه راضين
يوم الولي هب لهبوبك ذرابـه=وانتم لكم كل الخلايق مطيعين
ويوم الولي سكن هبوبك وعابه=الله حريبه مهزلٍ يا مساكيـن [/poem]
انظر كيف يتكلم بكل انصاف وعدم جحود لمراجل خصمه وطيبه وانما قال انها حظوظ ترتفع حينا وتهبط اخرى0
وهذا سعود اليابس الحافي من قبيلة عتيبه يصف كون حدث مع خصومه فيقول:
قبلي خشم(نطاق)لاطقـه الحيـاء=شمال من العـد الهمـاج حـدور
طاحوا به الفرسـان منـا ومنهـم=وردوا هل العاده علـى الصابـور
نطحنا العداء من يوم جتنا جموعهم=على سردهم والبيـرق المنشـور
وسقيناهم السم الذحـاح وسقونـا=مثـل نمـورن صادمـت لنمـور [/poem]
لم يقل فيهم اي كلمه تعيبهم بشيئ وبالعكس وصفهم بالنمور الضاريه وانهم اخذوا منا واخذنا منهم بالشجاعه
والقوه وهذا منتهى الانصاف وهو مانبحث عنه في وقتنا الحاضر وان يكون حبنا لقبيلتنا وغيرتنا عليها لايكون
دافعا لرفض الحق والمكابره والعناد وان نتيقن اننا بشر ننتصر ونهزم ونطيب دائما وربما تظهر الهفوه من واحد منا
مثل غيره من البشر وان القبيله لاتقاس بهفوة فلان وغيره وانما تقاس بمجملها فالقبيله اذا كان اكثرها كراما فهي كريمه
واذا كان اكثرها بخلاء فهي بخيله ولايعني عدم وجود البخيل في القبيلة الكريمه ولا الكريم في البخيله00
وهذا ابن حميد يشهد لخصمه اللدود في ذلك الوقت محمد بن هادي ابن قرمله بالشجاعه وانه ابادهم بحروبه
وهو شيخ قحطان كما هو معلوم فيقول ابن حميد:
الله على نـو (ن)يثـور غمامـه=يسقي من العارض اليا نقرة الشام
نبعد عن اللي ماتحلـل عظامـه=عيـت تبيـده الليالـي والايـام
زريبتن والضيـط تالـي طعامـه=وحنا يقزينا المنازل مـن العـام
الياشب ناره في خطـاة العدامـه=قمنا نحزم غالي القـش بحـزام [/poem]
فهذا منتهى المدح والثناء وربما لو كان القائل من قحطان لم يستطع وصف ابن قرمله وهو شيخه بمثل هذه القوه
والصدق والدقه بالكلام ويالها من نماذج رائعه تدعوا العاقل للتمعن والنظر جيدا بأن اكثر كلام السب والاهانه للرجال
ينعكس ضرره على المتكلم قبل المشتوم لانه سينزل من عين سامعيه في القدر00
وهذا حواس التبيناوي يخاطب سعدون الاشقر شيخ المنتفق بعد أسره من قبل جيش الجنازه في معركه وقعت شمالا فيقول ضمن
قصيدته المشهوره:
اما بنو الخير ماينحكـى بـك=انتم مربية اليتامى القديميـن
ندخل على الله ماجحدنا حسابك=انتم ضواري بس حنا ضريرين [/poem]
وهذا ساجر الرفدي راع البويضاء من عنزه يذكر كيف عاف نجد بسبب صولات (عبدالله)على خلاف بين الرواة عن المقصود
وهل هو عبدالله بن رشيد او عبدالله ابن فيصل ابن سعود0 فيقول:
يوم انها نجدن وانا من سكنها=واليوم مايسكن بها كل ممرور
شامت لعبدالله وانا جزت عنها=اللي يصبح به على فجة النور [/poem]
وهذه شهاده للخصم انه اجبره على عياف نجد طالما انه يفاجيه كل صبح بغاره وهو يبي الراحه والبعد عن المشاكل00
وهذا حمود بن عبيد الرشيد رجع من سفر فوجد الفقراء بالبيت
ليعطيهم على عادته ولكن حلاله لايزال مع الامير محمد الرشيد مااعطاه نصيبه الى الان ليعطيهم
فقال حمود يخاطب الفقراء:
ابطى علـي محمـدن بالبعاريـن=ومنين نعطي كان هـو ماعطانـي
يامن خبر يحذي وهو ماكسب شين=ياكود ابن ناحل بماضي الزمانـي
خلف عطى من غالي المال ياحسين=جعله يخلـد فـي نعيـم الجنانـي
ترد الهجافا يم بيتـه تقـل عيـن=يلقـون زاد مكومـن بالصيانـي
فعله ذكر باول زمانـه وهالحيـن=نورن يشعشع بالخفـاء والبيانـي [/poem]
فيقول مااقدر اسوي مثل خلف ابن ناحل الحربي اللي ماكسب شيئ بالمغزى ومع
ذلك اعطى الفقراء من حلاله الخاص00
ومقابل ذلك قال الحربي رويشد بن زقيحان يشهد لشمر بالكرم بقوله:
شمر مطيـرة الشعـاف الطنايـا=بهم على كـل المخاليـق نوفـي
أهل الصحون الشدق ماهي نسايا=وإلا نجيش مثل لمس الحيوفـي
انشد هل العيرات لاجـوا ونايـا=من اللي يهلي قبل عرف الضيوفي
ودلا لهم في كل واجب ركـا يـا=ما غيبن عن ضيفهـم لايشوفـي
فنجالهن يغدي عمـاس الخوايـا=ما هو( تنيول) صبهم له وقوفـي
وركابهم من كثـر الادلا حفأيـا=كم ذود مصلاح غدوا به شعوفـي
ياما خذوا من مغتـرات الرعأيـا=عوض أهلهن صفقهم بالكفوفـي
والله رب العرش جـزل العطأيـا=ما قلتها طمـاع أبـي معلوفـي [/poem]
والامثله كثيره يصعب احصائها ونكتفي منها بما ذكر هنا من شواهد00
وهكذا يكون الرجل العاقل يترفع عن الكلام الردي حتى مع عدوانه لان الكلام الردي
يهين صاحبه اولا ويدل ان هذه اخلاقه وهذه تربيته00
وكذلك لايجحد صاحب المعروف ومن اشتهر بالطيب حتى لو كان عدوا لان الطيب
يغلي الطيب سواء من البعيد او القريب000
اخوكم الراوي ابن غسلان00
[align=center]
ابطى علي محمدن بالبعارين
ومنين نعطي كان هو ماعطاني
يامن خبر يحذي وهو ماكسب شين
ياكود ابن ناحل بماضي الزماني
خلف عطى من غالي المال ياحسين
جعله يخلد في نعيم الجناني
ترد الهجافا يم بيته تقل عين
يلقون زاد مكومن بالصياني
فعله ذكر باول زمانه وهالحين
نورن يشعشع بالخفاء والبياني [/align]
[align=center]الله الله
هــــــــذا القصيــــــــد
وربـــــي شعــــــــراء قبــــــــل
رائعيــــــــن جــــــــــدا"..
الـــــــراوي يعطيــــــــك العـــــافيــــــه
عـــــــــزا الله دائمـــــــــا" علــــــومــــــــك
[align=center]
ابطى علي محمدن بالبعارين
ومنين نعطي كان هو ماعطاني
يامن خبر يحذي وهو ماكسب شين
ياكود ابن ناحل بماضي الزماني
خلف عطى من غالي المال ياحسين
جعله يخلد في نعيم الجناني
ترد الهجافا يم بيته تقل عين
يلقون زاد مكومن بالصياني
فعله ذكر باول زمانه وهالحين
نورن يشعشع بالخفاء والبياني [/align]
[align=center]الله الله
هــــــــذا القصيــــــــد
وربـــــي شعــــــــراء قبــــــــل
رائعيــــــــن جــــــــــدا"..
الـــــــراوي يعطيــــــــك العـــــافيــــــه
عـــــــــزا الله دائمـــــــــا" علــــــومــــــــك
تقــــــــود الـــــوجــــــــه..[/align]
[align=center]
لاعــــــدمنـــــــــــــــاك..[/align]
العزيزه قايده الخيل كل الشكر والتقدير لتعليقك النبيل
العضو الأكثر نشاطاً هذا اليوم 
العرض العادي
