بسم الله الرحمن الرحيم
قصص الكرم والطيب اللي سووها الجماعه طيور شلوا كثيره جدا يشهد بها القاصي والداني الا ان الناس
اشتهرت عندهم ثلاث اشياء وهي (شيلة الشلقان لخويهم) وكذلك (معشي الذيب) وكذلك لقب
(اهل اللحيسه) ويكتفون عن ذكر الباقي حتى خشيت ان تضيع بعضها خاصة التي لم نجد لها اشعارا
قديمه تضمنها0 ولذلك نظمت هذه القصيده ببعض سوالف الطيب والفخر اللي سووه الجماعه غير الثلاث
المشهوره ولعلكم تقرأون القصيده وبعدها سأشرح لكم القصص التي ذكرت بالقصيده00
يقول رجلن حروف السحر فـي قافـه=مثل الجواهر ودهن العود فـي سوقـه
اذكر فعايـل رمـاح المجـد واسيافـه=اللي فخرهـا شبيـه المـزن وبروقـه
وماكل رجلن يهـوم المرجلـه حافـه=لاشك ربعي تجيـب الطـاق مطبوقـه
افعال شمر تشـوف المجـد باطرافـه=بكفوف ناسن تعيـب الغـدر والبوقـه
جذره بحايـل تعلـى فـوق مشرافـه=ومن وين سارت يسير الطيب بعروقـه
شمر هل النيب ساس الطيـب برفافـه=تشبه رياضن زهى عشبـه وزملوقـه
مثل (1) ابن عايش كريمن بان ميقافه=مع جاره اللي حمـاه وقـام بحقوقـه
خاف المظامي ونجـم الليـل ماشافـه=والدرب يودع شيـاه الجـار مشنوقـه
خلا العشايـر بـدرب الجـار سلافـه=والشاة تشرب حليب المجد مـن نوقـه
جيران شمر بوقـت الحـرب ماخافـه=علمن شعاعه بغرب القـاع وشروقـه
(2) وسمير منا وريث الطيب باوصافه=يمنع نياقه ويسقـي طـرش مخلوقـه
حولة ظعونن وشمـس القيـظ متلافـه=اسقى طروشن تسـد الريـع وفلوقـه
رمت نياقـه وشـال المـوت خطافـه=وخلا نياقـه عـن الميـراد مصفوقـه
طيب ابن طارش يفوق السلم واعرافـه=خمسان زبنك بضيق الوقـت وفتوقـه
(3)وسالم ابا الرمل محدن بالكرم طافه=عجز القبيله كفاها الجوع مـع ضوقـه
لانام رجلـن يريـد الشـوق واردافـه=يسهر وكوبان يشخر حاضنـن شوقـه
يرسل طعامه لعجـز النـاس وعجافـه=ماهـي قريبـه ولا بالقلـب معشوقـه
عاف المـزاود ودمـع العيـن ذرافـه=من شان يشبع عجوزن شاب معلوقـه
من روس الاسلم كرام الناس واشرافـه=اهل اللحيسـه لكبـدن جـاه ساروقـه
وهذا(4) مكازي معشي زابنـن ضافـه=ذيبن لقى من غبـون الكبـر خازوقـه
جاب الذبيحـه لذيبـن جـاه رجافـه=فعلن عليه افخـر الاطيـاب مدفوقـه
(5)وشيلت مجيدع وقاع القوم ميهافـه=ماهي على طيب كل الخلـق ملحوقـه
شلقان غلبا سيـوف المجـد وشلافـه=والقيظ يشوي جنوب الزمـل بحروقـه
خمسة عشر يوم والمكسـور باكتافـه=وقاست خطاها لرجلن بالنعـش فوقـه
لو هو رفيقن لناسن ضاعـت اشوافـه=سووا لحوده وفـوق اللحـد طابوقـه
ماهي هروجن تجينـا كـذب وحيافـه=الا علومـن بطيـب الفعـل مطقوقـه
ياساس الامجـاد والعمـدان ونجافـه=لاشفت ناسن عـن المقـلاط مصفوقـه
ياورد الاجيال عشب الجـال واريافـه=والله فلاهـي بكـل الخلـق مسبوقـه
بالحرب شلفه لوسـط الـروح قطافـه=وللضيف تلقى جنوب الحيـل مشلوقـه
من ذاق قربه يعـاف النـاس ماعافـه=ومن ذاق ضربه يشوف الموت من ذوقه
ربعي عسـل كـل خلـق الله وهتافـه=ولاهي مع الضيق بالهرجات مطفوقـه
ارجي لياسار صـوب الـروح قصافـه=ادفن بحايل واشـوف التمـر بعذوقـه
ومن فضل ربي كثير الخيـر وانصافـه=جبت البطاقـه وحايـل فيـه مرفوقـه
هذه القصيده وقد اضفت عن الثلاث المشهوره ثلاث اخريات وهي كالتالي:
(1) مطلق بن عايش من التومان كان عند جار وحلاله وغنم ويوم وصل القيض وبغوا يرحلون لمواردهم
احتار بغنم جاره لانها لاتستطيع المشي ومجارات الابل فعرض عليه ان ياخذ الغنم من الجار ويعوضه
عددهن من الابل وهو مكسب خيالي لكن الجار رفض بحجة انه يغليهن غلا وعند ذلك قرر ان تسير الغنم
مع الرعيان من تالي الليل ويلحقون بهن على الابل وعند المغرب يحطون المشرب ويحلبون نياق مطلق
للغنم تشرب (بدلا من الماء) حتى **** الغنم يشرب معهن حليب عطايا الله وبقوا كذا ايام وليالي يسقي
غنم جاره حليب نياقه0 عساه للجنه اللي تدس عظامه000
(2) سمير بن طارش الصلعاء الخمساني جوه حدرة الروله مع بن دغمي على قليبه (رطيان) فمنع ابله
عن الماء علشان حلال الحدره وهن يحنن من العطش وسوى روحه مايدري من راع الابل العطاشا علشان
مايشتكون وقال لهم اطردوهن هذي همل لين يجيهن راعيهن 0 وبقيت اباعره عطشا لين مشوا الحدره
وكانت النتيجه ان لقحاته رمن اللي ببطونهن من العطش علشان يتجمل باللي طبوا عليه الله يرحمه00
(3) سالم ابا الرمل من الطواله من الاسلم ويسمونه ابا الرمل والرملا اللي مالها احد لازوج ولاوالي فكانت
زوجته متعوده انها تطبخ كل عصر عشاء يشبه عشاء العزيمه وتوزع عقب المغرب عليهن لدرجة ان بعضهن
ترسل ماعونه من العصر لبيت سالم وكأنه شي مفروغ منه وواجب لانهم تعودوا على ذلك سنين0
وذات يوم جاء واحد يطلبه دم واختفى برواق البيت ويوم بغى يرمي سالم لاحظه يوزع اللحم بمواعين
فانتظر ليرى ماهذا وكانت زوجته تاخذ المواعين وتروح توزعهن على العجز وطالب الثار يراقب0
وعندما انتهت زوجة سالم احضرت عشاه ويوم بغى ياكل رفع يده وقال فلانه ليش ماشفت لها ماعون؟؟؟
قالت زوجته فعلا ماشفت له شي؟ قال خوذي عشاي هذا لها اخاف انها مريضه0 فوجدتها فعلا مريضه
فساعدتها على النهوض من الفراش وتعشت العجوز0 ويوم رجعت زوجته قالت فعلا ياسالم لقيتها على
قولك مريضه0 ثم قالت ابي اصلح لك عشاء قال لا راح الوقت الان تكفيني القهوه0
فقام طالب الثأر المختفي يبكي من هذا الموقف لين سمعوا بكاه ويوم ابعدوا الرواق لقوه جادعن باروده
ويده على عيونه يبكي ويقول ياسالم ان ذبحتك من يشبع هالعجز ومن يهتم بهن ؟؟؟ ياسالم اشهد بالله
ان ذبحك حرام وانك عتيق بسبب عشاء العجوز اللي حرمت نفسك منه علشانها000
الله اكبر الله اكبر يحق لشمر وللاسلم خاصه وللطواله اخص ان يطاولوا برؤوسهم السماء لهذه القصه
ولو لم تفعل شمر والاسلم والطواله غير هالسالفة فهي كفيله بوضعهم عاليا مع النجوم في السماء0
(((الان بعد الشرح ارجعوا للقصيده تلقون لها طعم غير))) يابعد روحي انتم يالعزوه تحياتي000
العضو الأكثر نشاطاً هذا اليوم 
العرض العادي
