بسم الله الرحمن الرحيم
ديوان الشاعر مهدي معيوف العنزي
شاعر يمتعك بجمال شعره وجزالته
يشدك بروعة اسلوبه وجمال مفرداته
قصائده تنم عن حسن ذوقه الرفيع
واحساسه بقضايا مجتمعه
للجمال موعد ولنا موعد مع
الشاعر مهدي معيوف العنزي
تعال نعيـــش واقعنا ونرســـم لدروب دروب=ولانسأل عن الماضي علامه ذبلت ازهاره
بعد يومين والثالث يداوي هالغروب غروب=تلاقي الحق في درب الظلام الكل مختاره
يهل الشهر وخيراته تجي من كل حد وصوب=به الغفران والرحمه ياغيم(ن) كثرت امطاره
شهر فيه الاجر اشكال والتقوى سراج قلوب=ودعوه مالها حاجب عن الرحمن واستاره
نصوم وكل جـــوارحنا تناظر ربهــــا واتوب=عن الزلات في عمر(ن) سريع(ن) مرنا قطاره
تراويح العشا ونفس(ن) تناجي ربها باسلوب=خضوع وخوف من منهو عليم بكل اسراره
وليلة عــزها ربي بقــران بها مكتـــوب=ووحي(ن) في دجى مظلم غشاه اليوم انواره
(بليلة قدر)وإن لاحت تكفر لذنوب ذنوب=ولوكانت عدد رمل الصحاري وموجة ابحاره
ألاهي نطلبك رحمه ولاغيره لنا مطلوب=إلاهي عفوك وحلمك بنفس(ن) تسطلي ناره
قصدنا بالدعا وجهك ولبسنا من التضرع ثوب=عبادك يإلاه الكون لوجهـــك جو خطــــاره
بشهر(ن) أوله رحمه وغفرانك وعتق ارقوب=نقوم الليل واطرافه وكل(ن) بالرضا شاره
تعال بموسم الرحمه ندور لدروب ادروب=ولاتسأل عن الماضي علامه ذبلت ازهاره
قم ووقف ذاك هو الدرب عنه لاتحيد=واتخذ موقف لنفسك لاتطيل احبالها
ليمتى توقف شمال القائمه مثل البليد=ليمتى روح العزيمة بداخلك تغتالها
ليمتى تسكت وتسكت ليمتى صمتك عنيد=ليمتى تضحك وتضحك عالسنين وحالها
قم وناظر..قم تعلم مابقى شي جديد=مشكلتنا لو حكينا جلها بجلالها
من عروبتنا تعبنا واشتكى دمع القصيد=كن قافي لاتحدر سيل همه شالها
من فلسطين ابتدينا للعراق بكم شهيد=ينتفض دم العروبه في عروق ابطالها
كسرت((الله اكبر))كل غازي وكل قيد=حتى كسرى ضاع عرشه في ثرى زلزالها
لين ماضاقت بنا النخوات في عصر الجليد=والهقاوي مات عزه واندفن خيالها
عولمتنا ادفنتنا بين سادات وعبيد=واندثر فكر التحرر واختلف مكيالها
نبلع الاهات حسره والطغى فينا يزيد=والشجاعه والمروه من شرب فنجالها؟
لين فاح الشر واصبح في ثرى احساسي وقيد=ومابقى للصبر فيني حيلة(ن) يحتالها
كله الا سيد خلقه صاحب الدرب السديد=محمد المختار صلى الله على من قالها
لادنمارك النجاسه ولاتفاهات السويد=ولا اوروبا لوتجمع مع بقايا احثالها
يقدرونا لاوقفنا وقفت انسان(ن) شديد=نصرة الله ونبيه تستثير ارجالها
قم وقاطع لاتردد لاتقول انك بعيد=شوف سم افكار حقده عالجريده سالها
خلهم يدرون انك عند حقك ماتحيد=وان كلمة ((لا)) عندك فعلها يبرالها
قم ووقف لاتكلم خل فعلك بك يشيد=وروح عزمك في شموخك والبلاده اغتالها
والنصيحه قلب شاعر ارسل النبضه قصيد=يايقول الحق فكره اوعسى ماقالها
انا حياتي لودريتي مشاوير=عايش على كلمة غلا مستبده
احيان تنصفني واحيان هي غير=واحيان وبعض احيان ملعون جده
كني طفل كثرت عليه التصاوير=ولاعاد يميز بين كسره ومده
اعشق وقلبي ياهوى البال لك طير=ياتقتله مثل الطفل او تهده
وليا رحمته اسأله قبل تفسير=هوعاش من لامست بيديك خده
واذا سكت قله بعد دون تحضير=وش سالفة عين الوحش والموده
هوصاد ولاضيعته المناظير=هو رد ولاعالي الجو شده
والخد من خالط حماره دواوير=وعن لمسته لاارتخى ثم رده
والغره اللي دونها شاف تحذير=ممنوع لمسه واقترابك لحده
وعن الشفا من دون زود(ن) وتقصير=شط العرب لا خالطه بحر جده
فيها العذوبه كنها مية البير=ومن حمرة المرجان صعب(ن) يعده
والعنق لاتسال عليه المقادير=حتى عنود الصيد ماهي بنده
واليد لو ناظر بها سالم الزير=نسى كليب وصار في طوع يده
ماعاد فيها كيف او ليه هي غير=دام الحروف لوصلها مستعده
ولاتساليني ليه حياتي مشاوير=وكلمة غلا في داخلي مستبده
شوفي شعوري مات في ظل تعبير=ومن جور ليلي بيح القلب سده
السلام عليكم ورحمة الله وبركاته
وصلتني هذه الرساله من اخي/فهد عايد العنزي متضمنه هذه القصيده ورددت على قصيدته
واحببت ان اضع الصوت والصدى بين ايديكم عسى ان ينال على بعض من استحسانكم
الصوت:
جيت اشتكي لك همي اللي دوابي=هم(ن) سطى بالقلب واشعل سعيره
ياابوفهد والله محد(ن) درابي=عايش حياتي بين هم(ن) وحيره
شكواي لك يامسندي من صوابي=من جور همي والمدامع اسيره
جيت اشتكي لك حبها اللي سطابي=حب(ن) طفح بالقلب يكفي عشيره
شوق العيون اللي تداوي مصابي=حتى عروق القلب تشكي مصيره
في بورصة الاحباب سهمه كتابي=دومه مع الاخضر يواصل مسيره
ضيعت ياخالي من الحب بابي=ولقيت عيني من شقاها سهيره
جيتك انا محتار همي طغابي=ابي الدليل بحكمتك والمشيره
ياابوفهد وان كان حبه سرابي=تعبت ادور في سرابه غديره
بينت لك يامسندي كل مابي=يمكن يكون ابوحي اليوم خيره
واليكم الصدى:
للعز ناس وسيف عزك سطابي=من عقب ماضيع معاني جفيره
اصبح من الملاك من غير طابي=وبوسط قلب الحب عين سفيره
شابت به الايام والوقت شابي=والنفس من فرقى الحبايب خطيره
لايافهد ماغبت والصوت غابي=هيضت في شكواك خافي سريره
ادميتني ولامست بيدك صوابي=وذكرتني يوم المدامع سهيره
يومي هويت وضاع تالي شبابي=وادميت رجلي والخطاوي ضريره
تطري علي واموت من حر مابي=واضحك وروحي من عناها كسيره
حاولت اكتب مانفعني كتابي=اسير عين وعين تكشف نذيره
يامارويت وكن شي(ن) روابي=ألين شفته وارتويت بغديره
وياماسهرت وكن ليلي غدابي=حتى لمحته في شعرها تثيره
وان قلت هالرمان بالخد رابي=تشوف نظرة حقد بعيون غيره
حتى الكرز هيض بقلبي صوابي=من شاف نفسه في شفاته اسيره
لوقلت مت شلون؟ مدري ولا ابي=شي(ن) به الاحساس ضايع مصيره
ماجيت لك لايافهد في عتابي=أبين المحضور وأكشف ستيره
هذا الهوى مايعترف في جنابي=حتى الملوك بحضرته مستجيره
لاقال طاب الوقت فالوقت طابي=والنار ناره لوبغاها سعيره
وزبدة كلامي يافهد في خطابي=حكمة بها كل العوارف خبيره
اصبر وصابر واصطبر لاتحابي=هي كتبت الله علها دوم خيره