سبحان من يرزق بتوع الملاييـن=الرازق اللي ما يخيب الرجـا بـه
لي عم عنده معـرضٍ للصواليـن=أموت واعرف بس من وين جابـه
وإذا سألته قـال بعـت الدكاكيـن=ما يدري إني ما هضمت الإجابـة
الشاهد إني رحت له قبـل يوميـن=في قصره العامـر ودقيـت بابـه
قال أرحب أرحب عدّد ورد البساتين=يامرحبا باللـي لفـا يـاهلا بـه
قلت البقا عـدّ النفـل والرياحيـن=يا شيخ شمل أهل الكرم والذرابـه
قال اسلم الله يحفظك لي من العين=وآمر أوامر حضرتـك مستجابـة
قلت الصراحة طالبٍ قرب غاليـن=ودي تزوجنـي كريمتـك يـابـه
ثنّى وقال أهليـن والله وسهليـن=والكون ترخص لجل عينك رقابـه
لكن ترا عندي شـروط وقوانيـن=قلت اشرط اشرط يا حبيب الغلابـة
قال أولاً مهر العروسـة ثمانيـن=غير الرسوم وغير حق العصابة
والثانية عمك يبي منـك سبعيـن=رسم الأبـوّة والنسـب والقرابـة
وأم العروسة حقها منـك ستيـن=عشانها ست الحسـن والمهابـة
وإخوانها كلن يبي منـك خمسيـن=عداً ونقـداً تنـدرج فـي حسابـه
وخواتها الخمس عطهن من ثلاثين=عشان تتوثـق عـروق النسابـة
وتجيب طقم عيار واحد وعشرين=وخاتم من الماس المصفى ترابـه
وأكياس متروسة كعوب وفساتيـن=ألوانهـا وأشكالهـا مـاتتشابه
وموتر بسواقـه وفيـلا بدوريـن=أثاثهـا مـن بطرتـه ينحكـى بـه
واحجز لنا قاعة بقصر السلاطيـن=واحجز بهـا رقاصتين وربابـه
هذي الشروط اللي على بالي الحين=وذكرني اللي ما حسبنا حسابه
قلت اذكر الله يا عـدو المساكيـن=واستغفـره لا يبتليك بعذابه
الظاهر إنك منت عارف أنا ميـن=أنا لو أرقى فـوق متـن السحابـه
ما جبت حتى نص درزن مواعيـن=واضحك بكيفك واعتبرهـا دعابة
شروطكم هذي شـروط المجانيـن=شروطكم شغـل ابتزاز ونهابه
شروطكم تقصم ظهـور البعاريـن=شروطكـم همّـن وغـم وكآبه
شروطكم والله سيوف وسكاكيـن=تذبح بنات المجتمع مـع شبابـه
وين الرضا والعطف واليسر والليـن=اللي ذكرهـا الله بمحكم كتابـه
وين الصفات اللي أمرنا بها الديـن=وين اختفى نهج النبي والصحابة
يا عم جعل اللي خلقنا من الطيـن=يرد عقلك مـن خطـاه لصوابـه
ويجعل نصيبي عند غيرك قل آمين=ويحسن عزا الصابر ويجزل ثوابه
قال أنت لو فكرت تفكير صاحيـن=ماشفت في مجمل شروطي غرابه
حنا بعصـر العولمـة والمزاييـن=ماهوب عصر الفلسفة والخطابة
الناس تسعى للرتـب والنياشيـن=وأنت اهتمامك بالشعـر والكتابـة
والشعر ما ينفعك لو هو دواويـن=ما دام جيبك مثـل بيـت الخرابـة
يا بوك لا تسمع كلام المصاخيـن=واسأل مجرب عاش في وسط غابه
قلت الله أكبر يا محـرر فلسطيـن=من يسمعك يحسبك ذيـب الذيابـه
تراك شايب رأس مالـك رياليـن=والبنت ما تسوى جنـاح الذبابـة
قال انقلع مالت على وجهك الشين=لا عاد أشوفـك عندنـا يالزلابـه
قلت ابشر أبشر لكن الباب من وين=وأقفيت من عنده على صوت بابـه
[/poem]
العضو الأكثر نشاطاً هذا اليوم 
العرض الشجري
