{ ليل .. وسوالف .. وتعاليل .. سيرة شاعر .. }

وله ايضا

غديت مثل اللي زرع له زراعـه
في نقعة ما ربحت مـن زرعهـا
أحرص عليها من وديع الوداعـه
لاشاف له شوكـة كتـادة قلعهـا
يزل كل الليـل مـا نـام ساعـه
يروس ماه وفي عيونـه وجعهـا
والزرع في تالي ليالـي وداعـه
ضعف السواني عن صدرها قطعها
لاشك مسّـاه الدبـا ثـم صاعـه
ولحق العروق الناشبه من قوعهـا
كله الذي سرو الحيا فـي نخاعـه
ما تجتمع كان الولي مـا جمعهـا
واصبح على ضوح السرابه بقاعه
لي فاضت العبـرة بحلقـه بلعهـا
مثل البعير اللي تسوبـع سباعـه
ينوض وكعوب الرجل ما رفعهـا
لحقت خسارة راس مال البضاعه
يلعنـك يانفـس قتلهـا طمعـهـا
ماله على مكتوب ربـي شفاعـه
مصايـبٍ لاحطهـا الله رفعـهـا
عـزالله انــه زارع للطمـاعـه
كم طامعٍ نفسـه تطيـح بطمعهـا
المشكلـه لـو ان قلبـه رعاعـه
يبراك يانفـوسٍ تجاهـد ضلعهـا
ماهوب جضرٍ كل ما جاه راعـه
يصبر على بقعا وصكـت بقعهـا