يقولون : شعرك ماطلع له سنة وشهور
وقبل كنت تنشر ، والصحافة تراسلها
عسى ماحصل لك باس....وليا حصل ماجور
بعد غبت عنا غيبتك وش مطوّلها
وقلت : اسمعوا يالربع ، واللي سأل مشكور
أبا اقول كلمة .... والمحلل يحللها
أنا ابغى قصيدي يجبر الخاطر المكسور
جبر خاطر ٍ صكات بقعا تحمّلها
يسلي ضمير ٍ يبني الهم فيه قصور
ويشفي له قلوب ٍ تساعر غلايلها
قلوب ٍ من الدنيا تذوق القهر ، والجور
واهلها تخفّي ... ماتبيّن دواخلها
على شان لا القيت القصيدة ... وهم ّ حضور
إلى اكملتها...قالوا : ( صح لسان قايلها )
ماهوب الهدف ؛ قولة ( سفر ) شاعر ٍ مشهور
ولاتهمني شهرة من النشر احصّلها
رصيدي ... وراس المال...خصلة من الجمهور
رجال ٍ تعاملني بحشمة....واعاملها
وباقي الدعاوي معتبرها - هبا ً منثور
ولو غيري يحاول على شان ياصلها
أسير بطريقي ... وان لقيت العمي والعور
بعرض الطريق ... آمرّ ها واتجاهلها
وانا لو ( تركت الشعر ) تالي الزمن معذور
على الشعر اقدّم خطوتي واتثاقلها
إلي مدة ٍ كني على كتابته مجبور
أجيب القصيدة واتكاسل لا أكمّلها
وهالحين لجل اللي دعاني باطيع الشور
على الراس ...البّي دعوته واتقبّلها
أبا ارجع لنشر الشعر ، وانظمّ للطابور
عسى اسمي مع الشعار ينعدّ ف اوّلها
وعسى ان حل ّ لي طاري ...بكلمة (نِعم) مذكور
لي الطيب ... والعوجا لها من يعدّلها
ولو بارت الساحة واهلها.... فنا مابور
أبا اودّع الساحة ... وكثرة مشاكلها
وابا ارحل واخلّيها وانا خاطري مسرور
واجنّب عن القلطات ... واهجر محافلها!!!
العضو الأكثر نشاطاً هذا اليوم 
العرض الشجري
