صراحةً ماعاد تسوى ولاشي
مادامها وصلت ليا عزة الذات
من بعد كنت الحلم والشوق والضي
بقرى عليك الفاتحه والتحيات
عمرت لك قصر ٍ من الحب بيدّي
وانته هدمت القصر مره ومرات
الى متى كثر التجاريح ياخي
في كل ليلة نلعب(الذيب والشات)؟!
تشوف مااقدم علشانك شوي
وتشوف ماقدمت لي منك شيات
تكوي خفوقي واقتنع وابلع الكي
واسامحك وادمح من الشوق زلات
صحيح من قال الهوى غي في غي
ولا متى الحسنه تجازى بسيات ؟
ياما عليك العين ضاقت من المي
فاضت محاجرها تباريح وآهات
كن الشقا مخلوق في دينيتي لي
عجزت لا اقطع معه سلك العلاقات
الصدق عيب ٍ خالقه رازقي في
لي نية ٍ وحده ولك عشر نيات
تكذب علي وصار وضعك معي سي
كم مرةٍ يلحقني القلب شرهات
وان جيت فيك اشاوره قالي عي
يرسل علي اصوات واصوات واصوات
غصب ٍ علي اصبر بعد من ورى (ذّي)
حبك رسى في داخلي رغم مافات
مع ان من ينسى حلااله وهو حي
ماينفعه غالي حلاله ليا مات !
وان قلت لك ماعاد تسوى ولاشي
اكذب على نفسي من الذات للذات
العضو الأكثر نشاطاً هذا اليوم 
العرض الشجري
