ياملهمة شاعر تغناء للاذواق
هاضت مشاعر شاعرك يامديحه
هل السحاب اللي به الحزن سباق
وسالت على وادي جريره قريحه
اكتب نهايتنا على باب عشاق
وسوّر على قبري وكبر ضريحه
واقم عزاي وعنونه موت وافراق
واللي تسبب لي عسى الله يبيحه
ماتت طيور الحب من حزن الاشواق
حتى المشاعر فالسواقي طريحه
واضرب على طبل الفرح وانفخ ابواق
وقدم لعذالي كرامه ذبيحه
واشرب عسل وانثر من الورد معلاق
وغيّر مسارات الحديث الصحيحه
واشتم فهد واكتب على بيض الاوراق
عني ولا تكتب عباره صريحه
اكتب جفاء واكتب غدر حيل بواق
في ذاتي المزري تجمع قبيحه
خذ راحتك خل الحكي منك ينساق
قاموسي الشخصي تناسوا مدِيحه
ولك الوعد مني فلا اقول ياعاق
ما بحث ورى الغالي وادوّر مطيحه
ابقى على عهد الوفاء دوم تواق
حتى ولو نفسي تعاني جريحه
احفظك في بعدك ولا نيب سراق
مثلك يكرّم عن وجيهٍ كليحه
هيا اطعنيني واجعلي دم دفاق
من قلبي اللي يعشقك يامليحه
ثم اعلني جوف الملا عبر الافاق
اني جعلتك للمشاعر شريحه
وكان الجزاء قلتي بلا رفق واشفاق
جرمه بأنه ما سمع بك نصيحه
موت الأمل في جيتك سبب ارهاق
حتى الشذا من صدتك مات ريحه
يازين وش عندك على كسرت الساق
ساق الوصال اللي عليكم شفيحه
هل تذكري عهداً مضى فيه الاشراق
بالوصل ما كنا يدينً شحيحه
ياما رسمتك صورةٍ تزهو اعناق
في جيد شعراً منكتب في صفيحه
يهتز لك قلبي من الشوق خفاق
وفي شوفتك تقراء ملامح مريحه
راحت ليالي كلها قرب ووفاق
والموت من بعدك سمعنا فحيحه
هذا وانا وجدي تقطع به اعماق
ضيقه وقافيها مع الليل صيحه
ليتك على قلبٍ من الوجد حراق
ترجع تحنه تطلبه تستبيحه
العضو الأكثر نشاطاً هذا اليوم 
العرض الشجري
