يالله دخيلك عن خـبيثات الارواح=وعن طيحتي بالعجز عقب النشاطي
وعن قالة ماله بالاجواد نطاح=تشبط عزومك بالمغثه شباطي
وعن جيرة اللي مايفارق وينزاح=دايم على بيبان جاره يطاطي
او حاسد عينه تقل عين تمساح=تذرف ونـيـبـانـه خباث المساطي
أو ناصح ماهو للاجواد منصاح=وهو في دروب اهل الهوان متواطي
أما يبي صيد المكاسب والارباح=وإلا يزيد من الجدل والغلاطي
والا سروق يدخل البيت مزاح=وان وافق الفرصه رثع بالقشاطي
والا السهر لين ابيض الفجر ينباح=اقرى حـروف ما عليها نقاطي
وما كل من يضحك من الناس مرتاح=ولا كل مسجون من الناس خاطي
قلته وانا ماني للاوجاع جراح=أيضا ولا قلت الكلام اعتباطي
تجارب اللي في شروك العرب طاح=من دور ابن غانم ودور العلاطي
وخذيت بالقيفان سجه ومرواح=من هاجس في لجة الفكر ساطي
في ضامر اللي صاغها تقل مسباح=او رصف طابوق البناء والبلاطي
للي خذى في سكة الطيب مشواح =شيخ دخيله بالعرب مايهاطي
علي العضيبه حازها وين ماراح=بالبذل ماهو بالصخب والهياطي
والا الرخى كل يبي مثل شولاح=والمدح ماهو بالرجى والخراطي
سلام يامفني دبش كل مصلاح=الله يفكك يوم عرض الصراطي
طبعك وطبعي مايبي شرح وايضاح =وبساطكم ما يخـتـلـف عـن بسـاطي
دربي خذى عن عرض الاموال مصفاح=وانـتـه غـلـبـتـن يوم تطـلـق رباطي
وغـديـت انـا واياك حـبـه ومفتاح=وبـيـني وبـيـنك بالـهـروج ارتباطي
طـيرك على روس الـمـراقـيب لـفاح=بالـغـيم ما يرضى دروب الهباطي
ويشهد لك ابن الوايلي وابن قرقاح=ومحدن مدح شوك الحـسك والحماطي
وش هقوتك باللي على الموج سباح=مدري متى ياصل حـدود الشواطي
وسط البحر عندي مثل دور الاشباح=حـســه يسبب للـعـقــول اخـتـلاطي
ما بان لي بدر اللـيـالـي ولا ضاح=والريح ماله فـي سهيل انضباطي
من عقب ماني بين الاجـواد منساح=اليوم يقـطـانـي عـن الـقــوم قاطي
وهرج الشـمـاته يافتى الجود ذباح=يطعن بوسط الجوف مـثـل المخاطي
قالـوا تراك بغـرسة الـقـوم فلاح=تتـعــب وربحــك ما تعدى اللقاطي
قلت الغريس لمن خذى تاج الامداح=ولا هـو بديـوان الـكـرام احـتـيـاطي
ترسٍ لربـعــه عن مزاريق الارماح=لا هاج عاصوف القسى واستشاطي
درعه بحــزات الشـدايـد والافراح=يغـنـيك عن درع التنك والقواطي
[/poem]
العضو الأكثر نشاطاً هذا اليوم 
العرض المتطور
