أسعدالله صباحك واسعدالله مساك
التحية تعنى بالجهاز وتجيك
تحمل شعور قلبٍ يذكرك مانساك
ان وقف يحتفي بك وان جلس يحتريك
لو شكى نار هجرك قلت جعله فداك
موقفي ضد قلبي لو تمنن عليك
لان غيرك بعيني ماوصل مستواك
المحبة شراكة وانت مالك شريك
ياحلاوة قصيدي لاتشح بحلاك
شاعرك مابناها فوق ساس ركيك
هاك مما تيسر يا عنا الروح هاك
لين يروى خفوقٍ ماقوى يرتويك
انت نكهة شرابك مثل لذة ضماك
وانت سهم المحبة ماخسر مشتريك
غبت عن شوف عيني بس قلبي يراك
دام جسر التواصل بالموده سميك
من تهجى حروفك بان له محتواك
هكذا قال قلب بالغلا محتويك
ياسمي الشروق وياشبيه الملاك
من بلاني بحبك ياعسى يبتليك
انت نظرت عيونك للهواوي هلاك
الضحية قبالك والقرار بيديك
العرض الشجري
