سالفة:الطقاقات والعماره

مشرفينا ، اخواني، اخواتي ،زوارنا
السلام عليكم ورحمة الله وبركاته
صبحكم / مساكم الله بكل خير
من الاشياء الجميله قديماً:
(الطقاقات)
الطقاقه هي من يقوم بالضرب على الدف بالزواجات لأحياء الزواج بالرقص وأدخال البهجه على اهل العروسين والمعاريس وايضاً أعلان الزواج، وتقوم بشيئ يسمى (العماره)
العماره بعد دخول العريس لغرفة العروس وزمان مافيه زفه مثل الان،، فكانت الطقاقات تروح عند باب الغرفه وتطق عشان يجدع لهم ما كتب الله من المقسوم،، والمقسوم حسب أمكانية العريس الماديه ليست مشروطه،، فمنهم من يجدع اوراق ماليه، ومنهم من يضع ريالات فضه،، وتسمع لها رنين بداخل الدف، والراهي عاد يجدع جنيهات ذهب،، كل هذه الاموال بالنسبه للأن لا تحسب شيئ فالعشره ريال بذاك الوقت لها حنه ورنه ..
الطقاقات تطق وتغني ويسمى شوط وصاحبة الشوط تكون أحد الحاضرات وعليها ان تجدع مبلغ مالي لايتعدى الـ5 ريال بدف كبيرة الطقاقات وهي المسئوله عن جمع الجدعات لين ينتهي العرس ثم يقعدون على جنب ويتقاسمون ربحهم ..
بواحد من العروس اللي حضرتها زمان ..
كان الاتفاق مع الطقاقات انهم ما يطقون للعماره إلابعد ما يطقون سامريه ويختمون فيها العرس بعد نص الليل اللي هو ما يتعدى الله العالم الساعه 11مساءً وكل ما طقو واستانسو جت كبيرتهم وقالت خلاص خلاص السامريه يابنات همن تبدا:

جزا البارحه جفنى عن النوم
جزا من غرابيل الزمان
همن تجي تركض ام العروس اصبري اصبري تونا وتهاوش هي وطقاقتها شوي ويرجعون يكملون الطق ..
الطقاقه عارفه ان المعرس راعي حلال ومال وبيته قصر،،ومن عادة المعاريس المراح ببيت العرس لكن تخاف يسري لبيته هو والعروس قبل تاخذ العماره،، لأن وش بيخليه يمرح ببيت طين وقديم ومهجور ويمكن مسكون من كثر الطق ..
طقت شوي همن رجعت على سامريتها يوم حمقت ام المعرس
والحريم منول يلبسون غدفه يلفون به روسهم او شيله اللي هي تسمى الحين طرحه،،وكل ما كان لون الغدفه اسود غامق دل على سعرها الغالي وقيمة من يلبسها ..
حمق ام المعرس ما انتهى عند كلمه من ذي وكلمه من ذي لا
ماعاد شفنا إلا عيون ناقزات القويه من الحريم زنطت اللي اضعف والطقاقات عشان عيون العماره اشتغلو بالبقوس وشد الشعور وترفيس لين رقو الدرجه وطلعو لغرفة المعرس وهن شايشات ومشوشات وطنقق طنقق
عطنا العمااااره لايجيك ماجا ذوليييك
عطنا العماااااااره ترى الشر من غيرها يجيك
يوم فتح المعرس الباب
هذولا أوادم ولا جند المغول والتتار وجدع لهم العماره وكلن راح لحاله ولو هن بهالوقت كان زرعو لهن شعر عقب اللي تطاير..
تحياتي