مدخل
ان جيتني تنشد عن الحال ياخـيّ
شف وردتي ذبلت على المزهريه
عمق
عمري رساله قبـل القـى لهـا ساعـي
غدرنـي الوقـت بظـروفـه وقطّعـهـآ
خانتني الريح .. مدري الخاين شراعـي
من غير الآمـال ماتـت قبـل اجمعهـآ
انام واحلم : متى تتعـدل اوضاعـي ..!
واذا صحيت .. آخـذ احلامـي اشيعهـآ
اضحك مع الناس واخفي عنهم اوجاعـي
وان شافني واحد اضحك قـال : بايعهـآ
من بعد ماراحت اغلى نبض فأضلاعـي
وانا المواجـع تصارعنـي واصارعهـآ
كنت انتظرها وانا في نومتـي.. واعـي ..!
اخاف لا أحلم بهـا واصحـي واضيعهـآ
كانت معي تشطب الظلمي مـن شعاعـي
والفجر يوقف علـى البـاب ويشجعهـآ
كانت .. تجي مثل صوت الناي للراعـي
من كثر شوقـي ادورهـا وانـا معهـآ
كنت اشتكيهـا لحـزن الليـل والداعـي
واوصـي البـعـد لاجـاتـه يرجعـهـآ
من كثر مااحـس معهـا قمـة ابداعـي
مااحس روعة قصيدي .. قبـل اسمعّهـآ
اقول : لاماتـت ايامـي مـن الناعـي ؟
وتقـول : الايـام تنعيـهـا مواجعـهـآ
واقول : وجروحك اللي مالهـا داعـي ؟
وتقـول : خـل الجـروح الله يقلعـهـآ
زرعتهـا حـب ياخذنـي لمربـاعـي
ونبتت لغيـري وانـا للعمـر زارعهـآ
خلتني آعيش بيـن الحـزن وضياعـي
مستقبلـي ضيّعـتـه .. الله يضيعـهـآ
مااذكر بكيت .. البكا ماهو من اطباعـي
اليـن مامـرت الـذكـرى بشارعـهـآ
ولاكنت احسب السنين بتلـوي ذراعـي
الا بعـد حطـت ( الدبلـه ) فأصابعهـآ
يالحزن.. رح يمّهـا دام انتـه الساعـي
واخـذ معـك كلمتيـن لـزوم تسمعهـآ
ان كان ندمت بعد ماعرفـت اوضاعـي
فهمهـا بـأن النـدم ماعـاد ينفعـهـآ
وان كانها في شهر .. قدرت على وداعي
انا اربع سنين .. مدري كيف اودعهآ !!!
مخرج
ياخاطري لاتنكسردامنـي حـيّ.
من شان لايفرح عذولـي عليـه
لأرواحكم النقيه
العرض الشجري
