الحب مثل البحر ما كلن ايعومه=به موت وفيه الحياه وصعبه أمواجه
الموت بامواجه اليا جات مسمومه=تذبح خفوقك وقلبك يصعب اعلاجه
ويدور فيك الزمن وتكره احلومه=يضيق كل الفضا تصغر لك افجاجه
وتموت الاحلام وتصبح حيل معدومه=وتضيع كل الأماني تهدم ابراجه
واما حياته ليا من خليت اهمومه=دايم تعيش ابسعاده ساطع اسراجه
اوصفه كنه سما ساطعتن انجومه=هذا هو الحب نوره صون منهاجه
ياكثر ياكثر مانقرا عن اعلومه=قصص جميله وكلن يضحك احجاجه
يا لوحة الحب بالاقدار محكومه=نفرح اليا زان ونصبر لابدا اعجاجه
ياقلب عود بعد مابانت ارسومه=مالك ومال الشقا ودروب منعاجه
ارتاح خل العنا لا تلبس اهدومه=الحب متعب ومزعج ما ابي ازعاجه
الحب مثل البحر ماكلن ايعومه=به موت وفيه الحياه وصعبه أمواجه