هب الهوى يوم أنصف الليل ليلين

هب الهوى يوم أنصف الليل ليلين=أحيا سنا الجمره و زاح الرمادي يا فاتنه وش جاك مني تغيـبين= بعـــدك يعذبــني وقربــك مـــرادي أن كان قصدك يوم غبتي تغلين= الصــبر طرّف والليالــي عــوادي تجملي لا تفـّرحــين المعادين = أنا مــناي اللــي يغيــض الأعـــادي ردي بسرعه لا تقولين بعدين= قلــبي علـيك ومـنك حاديـه حــادي قضيت من عمري على وصلك سنين=يوم الزمان أمان والجو هادي أشوف مـن سـود المقانع ملايــين=أنتــي بوادي والعــذارى بوادي أغليك و أزعل منك وأنتي تعرفين=لا أنتي صديقاً لي ولا أنتي معادي بفنون تمويه الحقيقه تجيدين=أخذت مـن طبـعـك دروس و مبــادي يا شين طبعك تزعليني وترضين= وتعانديــني وش يفــيد العنــادي أن جيت يمك عن طريقي تروحين=وأن رحت جتني منك دعوة ودادي تقربينــي منك باللطـف واللــين=وتعطيني الورده وشــوك الكـدادي ليــتك بهمً صابنــي منــك تدرين=أنام وعيــونك تعــــاف الرقـــادي ساطع جبينك بين سود الجديـلـين=مثل القمر مع رايح المزن بادي سود العيون اللي عليها هلالين=هلالين معكوسين رســم وسوادي عليك من نظرة ورود البساتــــين=أستانســت للساقــيه والـبرادي عليك من لمحة وحوش الشياهـين=وعليك من رقصة مهار الطرادي انتي لحالك تامرينـــي وتـنـهـين=والا لغـــيرك مايهـــون إنقيــادي قلتي لي أن الســر مابــين الاثنين=وأقول من فتش قلوب العبادي وقلتي لي أن الصبر عون المحبين=وأقول أنا صابر وهذا إجتهادي وقلتي لي أن الحب جماع قلبين=وأقــول هذا اللـــي يعذب فــؤادي وقلتي لي ان الوقت يمكن يجي زين=وأقول يمكن مار ماهو وكادي سلطان حبك ما يعرف القوانـين=وصبري على فرقاك صبر المهادي كانك من الجرح الندي تستفيدين=هذي جروحـــي بالظماير جدادي

مما راق .... لي وبقووه ..