أولا : السلام عليكم ورحمة الله وبركاته
وعساكم دوم بخير
اليوم الجمعة في تمام الساعة الخامسة عصرا غادرت حائل مسافر للمدينة التي أعمل بها
بعد إجازة دامت أربع أشهر وحز في خاطري فراق حائل وكتبت هذه الوداعيه بحائل التي بالفعل تستحق الشعر كله( وهي غزلية لكن في أغلا محبوبه حــــائــــل)
أترككم مع القصيدة عسا أن تنال إعجابكم وتسمو لذائقتكم وأرجوا منكم المعذرة فحائل تستاهل أكبر من قصيدتي
مقدر على التوديع يانور عيني=عندي ترى فرقا المحبين شينه
غمضت عيني لا تلدين فيني=دمعه بوسط العين حارت حزينه
ودي بكم مير أزعجتني سنيني=والله يعين اللي شقا في سنينه
قلبي على الفرقا بنبضه حزيني=كنه يقول العذر لو تعذرينه
والرِجل حارت ما مشت خطوتيني=أسوقها بالغصب سوق السجينه
لو تسّتمع لا قفيت صفقت يديني=كني شجاع ٍ باللقاء غالبينه
أو تسّتمع للي صدر من ونيني=في داخل ظلوع المعنا ونينه
ونت سجين ٍ ضاع عمره سجيني=حتى من الزوار هم حارمينه
ذي حالتي عسا الولي بي يعيني=واللي يفارق جعل ربي يعينه
لاتحسب الفرقا قسا ثم تليني=لا والله الفرقا قسا عارفينه
ياشين فرقا من نبيه ويبيني=ياشينها لا صار قلبي رهينه
كتبت حزني بين نفسي وبيني=وغنيتها بمفارق أطلق مدينه
تدرون من هي ماخفت للفطيني=حائل بها عشق ٍ صفا شاربينه
يدري بها شام العرب واليميني=ويدري بها التاريخ ومترخينه
فيها الكرم والجود ماله وزيني=والظيف له حشمه ولا أحد ٍ يهينه
من عهد حاتم لين تفنا السنيني=تاج الكرم بين العرب مالكينه
ودعتها والشوق يزداد فيني=والصدر يحرجني بكثرة حنينه
ودي بها مير القدر مايزيني=ودي بها وأثر الليالي فطينه
ماتترك الولهان لحظه وحيني=دستورها فرقا المحبين زينه
وحائل ياحظ اللي بها ساكنيني=حائل وأكررها هي أطلق مدينه
أخوكم
محمد الفريدي