لاغارت الكدش وكحيلان باصطبله
مهما يكون الشعور اللي علي بادي=لازلت انا الوارد اللي ماطوى حبله
على القراح الزلالي طال تردادي=اشرب واصدر ظما مدري وش اشرب له
يامن تغاربتي غيابي وهو عادي=بعد الرجل عن دواعي ذله اهيب له
ماامشي قبل لا اعرف الوجهه بلا قادي=ولاصلي الا وانا متقبل القبله
منزالي النايفه عن حدري الوادي=ورجلٍ يجي في مسيل السيل يا هبله
أبعدت مالي غرض في ذل مقعادي=مادام يلعب لي الذعذاع والعب له
ماني لعرفي مع اهل العرف مترادي=لاشك كبدي من اللي شفت مندبله
يالاقية خير هاك العلم للغـادي=اللي عجز يفرق الشيحه من الربله
أمانتك بلغيها لكل حسادي=لاغارت الكدش وكحيلان باصطبله
أنا أول العشر ماني للعشر حادي=مالك ومال افتراض الجاهل الأبله
يموت انا حاسدي ما ياصل ابعادي=منّي نجوم السما لو يفهم اقرب له
ولابد ما الهايج المايـج يجي هادي=وكلٍ يشوف المكان اللي يناسب له
إن مت مات النبي وآباي واجدادي=ومادام لي يوم ماني ميّتٍ قبله
|