يا الغالية

يا الغالية من حـدد الحـب غلطان ******* الحـب يُـزرع والمشاعـر تغذيه

بالسوق ماله وحـدة قياس ووزان ****** وإن كان عندك وحدة قياس قيسيه

لا تحسبين الحـب يوزن بمـيزان ******* ولا تحسبين اللي يبي حب يشريه

الحب أحاسيس ومشاعر في إنسان ******* يشعر بها في داخـل القلب تلويه

والحـب ينبوع السـعادة والأحزان ******** يسـعـد به اللي ود خله يساويه

وأحزان لو جاء فيه زود ٍ ونقصان ******** قلبٍ شـروق وقلب سـودٍ لياليه

فيه السعادة والتعب صاروا أخوان ******* وجرح الغرام الطب يعجز يداويه

يا الغالية للحـب لوعات وأشـجان ******** والقلب يكشـف كل ما كان يخفيه

والحـب للعـشـاق جنه ونـيران ******** كلٍ على حجم المشاعر وقع فيه

يا كـم في الدنـيا حـبايب وخلان ******* ويا كم خفوقٍ نار الأشواق تكويه

ويا كم في العالم من قـلوب عميان ******** تطرد وراء مقفي وبالحب تطريه

يا الغالية للحـب رقـة وتحـنان ******** لكن من لا يعـرف الصقر يشويه

اللي عن الماء صد ما هو بضميان ******* لا بد وإنه شـاربٍ كأس مـرويه

يا قلب نبضك شوق والا انت ولهان ****** وإلا بفكرك حـلـم لازلت ترجيه

يا قلب خـل الصبر غاية وعنوان ******* والحـر كـلـمة لو سمعها تكفيه

الشهم عنده صادق الحـب ما هان ******* بين الحـنان وخالص الود يطويه

ثابت قدم واقـف على سبعة أركان ******* يسـعـد حبيبه ما يصـد ويعنيه