بغيت أكفر ذنوبك وأهتويت الذنوب
ونزفت دمع المحبه من عيون الخداع
أقبلت أكفكف دموعك والمشاعر تذوب
وتعانقت حربة الخاين وقلب الشجاع
رحنا ندور بعضنا في شتات الدروب
والشوق فاحت قواريره وحنا جياع
وأجتثني من هبوب الريح نسمة هبوب
لقيت فيها لبعض الذكريات أجتماع
عطرك ونسمتك وألحان الزمان الطروب
وأحلامنا والخيانه والوفا والقناع
من بعدها ضاق بي صدر الزمان الرحوب
وأخترت صدك وهجرك في حياتي متاع
الحب شمسه علينا مايلت للغروب
والليل سدل هماليله وفل الشراع
مدام الألسن تطلع ماتكن القلوب
أبا أستمع في كلامك وأحسن الأستماع
مايعلم الغيب غير اللي يدير الهبوب
ولايحل القضايا غير راين مطاع
وأنا بعد عشقك الممنوع رحت أمغلوب
وش لون أعوض زماني في سنين الضياع
ياغلطة العمر كل اللي علي محسوب
والحد بين وبينك مثل حد اليراع
والله لو الجوارح فالمحبه تذوب
لا كان قلبي وعرقه من محبتك ماع
يومن عيني تجاهك ماتشوف العيوب
ماجيتني شبر غير أقبل لوجهك ذراع
واليوم كني على ذاك الطريق مغصوب
أمر شارعك وأرجع مع طريق الوداع
أن كان تبغا تخفف من ذنوبك ذنوب
أنا دخيل الشفايف والعيون الوساع
لاعاد ترحل وتتركني بغيبتك أذوب
وألا أليا رحت أخذني عن وجيه السباع
أدري أنك أنسان لاهي فالزمان ولعوب
لاكني أخترت أحبك حب لين النخاع
،
لـــ الشاعر / عبد المجيد الذيابي
العضو الأكثر نشاطاً هذا اليوم 
العرض الشجري
