تباشروا كل العدا=طاح الجمل طاح الجمل
كل شهر سكينته=ويسنها بأقرب حصاة
أحد مسك وأحد نحر=وأحد قطع وأحد أكل
وأحد عرش مخ العظم=حتى أصبح الهيكل فتات
ما أحد شبع من قسمته=تهاوشوا بعد وقبل
أكالة لحوم البشر=تباشروا به مات مات
ثم غسلوه بغسلهم=بئس الغسيل و من غسل
بئس الكفن من خامهم=بئس الجريمة و الجناة
دوك الكفن لونه " حمر "=يشهد على جرم حصل
هاك الأيادي القاتلة=بالدم تبقى ملطخات
بالصف الأول كلهم=تململوا كـل عجل
حتى إستقاموا وإستووا=وأدوا على الميت صلاة
ثم مشوا بجنازته=خلف النعش كل يهلل
دمعة حزن يا كذبهم=بعيونهم تقرا الشمات
ثم دفنوه بحفرة=في قاع بأسفل جبل
من حقدهم بعد الدفن=حطوا على قبره صفاة
ثم اشعلوا نيرانهم=فـي ليلهم ودقوا الطبل
تسامروا حول القبر=تراقصوا رقص البنات
حل الصباح ولاتجد=فيهم أحد ماهو ثمل
من كأس ليل البارحة=إستغرقوا بأعمق سبات
حتى إستفاقوا بالمساء=من سكرة البارح تقل
ما همهم هاك الجمل=ماهمهم هاك الرفات
هاك الجمل فـي عرفهم=بالذاكرة ماله محل
دام الظروف تغيرت=لاتذكرونه يا الرواة
يا لعنبوهم كلهم=عبادة اللات و هبل
عبادة الكرسي الخشب=عبادة العزى ومناة
يا لعنبوهم كلهم=عبادة القرش و هلل
وريال واحد عندهم=أكبر صديق بهالحياة
يا لعنبوهم كلهم=والله مافيهم الرجل
وأكبر شنب بأمثالهم=تستخسره يلبس عباة
أمس القريب بمجلسي=كأنهم حسبة أهل
آويتهم كسيتهم=سترتهم كانوا عراة
الأقنعة بوجيههم=والألسن تنقط عسل
والأساود قلوبهم=خلف الضلوع المبهمات
إبن سلول يقودهم=وأبولهب وأبوجهل
ومسيلمة وأتباعهم=مثنى و ثلاثة وأربعات
خلف المصالح كلهم=بأمثالهم وحي نزل
والا الغريق ببحرهم=مايأمل بطوق النجاة
وأستصرخك يا هالزمن=كم مجرم فيك إنتحل
شخصية إنسان بريء=مـن كل سبع الموبقات
هاك الجمل يبقى جمل=دامه علـى الله يتكل
كبوة جواد و ينتهض=يأمرهم بدفع الزكاة
تباشروا كـل العدا=يا ويلهم حان الأجل
ثار الجمل ما يندفن=عايش معي رغم الوفاة
العضو الأكثر نشاطاً هذا اليوم 
العرض الشجري
