حب أستطـــلاع ,,وألاّ شفـــايه

.
.


ههههههههههههههههههه اللجاوي الله يكره شيطانك ..


اقول يالسمي الظاهر ان كل اللي اسمهم خالد طخوم ههههههههه ولاّ وش يبي بك هالرجال يتولجك ؟

ههههههههه والله فاطس الله يرجك ياللجاوي



ذكرتني يومي صغير .. خبرك كنت اطخم مرره اكثر من هلحين .. الوكاد فيه واحد من الجماعه اسمه ابو بداح
لاجاء بشبة الوالد الله يرحمه .. ما ينزل عيونه مني

والله ياللجاوي لو انك لاحقن عليه إلا تركض بالشارع حافي هههههه مره مره ما يعطيك فرصه .. عينه بعينك 24 ساعه !


كنت اتضايق فعلا .. ولأني تخبر ولد صغير وما اقدر اقول له شي وهو شايب .. ! طبعا صعبه اقول له هيه انت ترى اترفش ببطنك هههههه ماهي لايقه

اشتكيت لأمي ههههههههههه قالت لازم نشوف حل لا ينضلك


ينضلك = ينحتك يعني يعطيك عين ..


الوالد قال هذا طبعه تراه يناظرك بك وهو يفكر بشي ثاني // قلت طيب اللي يفكر لا لفيت عنه يمين يسار ما يتابعك .. !


تدري بالاخير وش سويت ؟


عودت نفسي عليه وصرت اسوي له حركات استخفاف ههههههه عاد انا دكتور بهالأمور .. صرت اكشر ! واقلب عيوني واطلّع لساني

لين صار يحس .. !


عقبها صرت لا قعدت اصب القهوه .. يخليني اصب له سبعين فنجال .. شكله حقد الماخوذ //


يوم تعبت من الصب .. قلت له // ابو بداح تكفى ارجع مثل اول طالع بي لين تمل ههههه وصارت السالفه ضحكه بالشبه ..


عاد لو اقول لك ما تصدق .. انه كان الله يرحمه إمام مسجد .. ! الله يرحمه ويغفر له ويجعل مثواه الجنه ووالدينا ووالديكم وجميع المسلمين




الظاهر اني قرقت واجد


لكن موضوعك حلو .. وبه جو ترفيهي حلو .. مثلك ياللجاوي انت حلو ولا تجيب إلا الحلوووووووو




تقديري لك وللجميع //