همس الليل ....متجدد

عندي رساله ويش اخلي ويش اقول***اقول واحشني وانا من وحشه افراقك شكيت


عزالله اني في غيابك من نزول في نزول*** يا وردة اسقيتها ويوم اثمرت لي ما جنيت


غير ان غيري يحصد اللي ازرعه اربع فصول***ولا لمجهودي اثمره ولا خلف يومي سقيت


عاهدتني وحلفت لي بالله تعالى والرسول *** ثم خنتني ما خفت ربي في سواتك واستحيت


لكن عسى ربي يعوضني وللجهد محصول ***ويعمر الله ما انهدم في غيبتك ما قد بنيت


ما عدت ابستغرب غريب في زمان به ذهول ***عز الله اني من دروس الغدر يا قلبي اكتفيت


ومعاد في درب الغرام العذب يا خذني الفضول***ولاعاد يغريني السراب ولمعته لامن ضميت


ياليت ما في الحب فرقا والتفاته من عذول*** او ليت ربي ما خلق ها الحب واتعابه يا ليت



خليتني اغوص با الاشعار واثير العقول*** في غبة نادر من الشعار يرسي ثم رسيت


كله عشان انك تفاخر با القصايد يا الزعول***وعشان شعري يكتب اللي ما لسمعك قد حكيت


احاول القى ما يبرر لك غيابك من حلول***وازريت الاقي حل مقنع يعذرك لامن نسيت


تعبت اكابر واتضاهر با السعاده يا الجفول ***با ني لقيت اللي يعوضني الغياب ولا لقيت


ما هد حيلي غير صبري لثقال من الحمول*** لو ان دمعي لا أنهمل بيعوض افراقك بكيت


تصدق اني صرت احس الشعربعدك به خمول ***من بعد كانت في وصوفك تنحني لي بيت بيت


وتصدق اني صرت ميت قلب وانا لي قبول*** في سوق تلعات الرقاب وبعت من قبل وشريت


انا ادري ان ما كل زول يعوضني في فقد زول*** ياكثرها الازوال حولي بس مثلك ما لقيت


وانا ادري انك في العروق ونبضها عرض وطول*** مثل ما ادري كم مره في غيابك قد شقيت


وانا ادري ان الوصل صعب ورجعتك صعبه وصول***ان كان تدري يا مشقيني واظنك ما دريت


عن ما اكنه لك بقلبي من حنين ومن ميول *** واطوي شريط الذاكره عادك وفي وانا وفيت


غيبتك طالت واستمع لك كلمه بصدري تجول*** لو كان تعرف وش تسوي غيبتك لامن طريت


ان كان لا تحرم تروح وتترك القلب معلول*** وتعيد في الهجر النظر ثم تعتذر عن ما بديت


لكن عسى الله ما يشقيني ويجعلني أنول*** محبتك يا أغلى بشر مر بحياتي من نشيت


والحين قلي عن غيابك ويش اخلي ويش اقول***اقول واحشني وانا من وحشة افراقك شكيت