يمه غدرني الشيب قبل أفرح

.

يمه غدرني الشيب قبل أفرح بشيٍ مشتهيه=أثري نحرت البحر وانا كنت اخاف من البلل
يمه ترى حتى العسل ناسٍ تعرفه ماتبيـه=والا ترى الله مطريٍ في سورة النحل العسل
يمه ترى لوكل رجالٍ جاء مثل جدّه وابيه=ان كان صاروا كل خلق الله نبيين ورسل
كم كنت القح نخل جدّي رحمةالمولى عليه=وان قلت برد يقول "عمر البرد مالقّح نخل"
وكم قلت فاسي ثلّمه جذع الأثل وازريت فيه=والبيد سيل من الجفاف وشلون ابحطب لك أثل
والبير ياجدي حِثل والحِثل ماحدٍ يرتويه=وشلون ابرمي الدلو في بيرٍ وصافيها حِثل
ويقول"مزن الغيب يذبحه الظما من يحتريه=لابد مانشرب هماجٍ لين نلقى له بدل
ولّم حطبك وماك واللي كتب له رزقٍ يجيه=ودنياك داريها قبل مايسبق السيف العذل "
طفولتي كانت رجوله مابها افراحٍ وتيه=في داخلي حتى البراءه عاشت رجولة طفل
طفولتي همّ وشقى يمّه ولا قد قلت ليه=حتى مراجيح الطفوله كانت شداد وجمل‍
أكبر ويبقى الهمّ فيني مثل ضيفٍ بالوجيه=أهجّ من رمضا الضياع لمربعانية ملل
يمّه ومن حظّه مثل حظّي ردي لا تعذليه=لو ساقته فوضى الزمن لديار عاقلها خبل
حاولت من عاري الزمان اخذ سمل ثوب ارتديه=واثري مثل من حاول بياخذ من الحافي نعل
أحلى شبابي وانتهى في غربتي قبل ابتديه=ما لولشت له بنت بدو اتمشط اطراف الزعل
رجعت مثل اللي طلب ثار ولده من عند اخيه=شديت بالقعدان حملي يوم ضيعت الزمل
يمه وكلٍ قال ما لأمه مثيل ولاشبيه=واللي خلق كلّ النساء مالك شبيه ولا مثل
يمه دخيل تراب ماطا رجلك الدمع احبسيه=هالكون كله مايساوي دمع عينك لانهمل
يمه فرح والا حزن دمع الغلا لاتسفحيه=تبقى دموعك غاليه لوكان سبتها بصل
ولاّ انا حظي كذا مافرح بشيٍ مشتهيه=يمه مادام اني غرقت وشلون اخاف من البلل

.