شقاوة الطفولة مع ( أنوار الشمال )

,,,, بأإأإأك ,,,,


1- مكان الميلاد ..؟

حائل


2- ترتيبك بين أخوتك ..؟

الخامسه

3- أكثر شي يزعج أخوانك منك وأنت طفل ..؟


السؤال سئلته لثنتين من خواتي وحده قالت ارسلك تجيبين ماء تروحين وتبطين واخرتها تجيبن بكاسه ولا ونص بعد >>> يا الله اشيله

والثانيه تقول انقهر منك ابي امشط شعرك وتصيحين >>> الوحيده اللي شعرها قصير با البيت عشان كذا ودهن يمشطن شعري

كنت اخر العنقود والوحيده اللي ابطت امي ما جابت بعدي كنت مدلعه بشكل مو طبيعي لين جو الثلاثي المرح هههههههه

اما امي سئلتها قالت كنتي عنيده اي ثوب للعيد اجيبه لخواتك يسكتن وانتي تبين على مزاجك وتصرخين لين نجيبه >>> شلون لو على ايامي فله وباربي وش كنت اسوي


4- من الأقرب لك أبوك أم أمك في طفولتك ..؟

امي لاني لما كنت اخر اعنقود ابطت ماجابت بعدي الا بعد اربع سنوات ولما كانت تروح

للمدرسه تاخذني معها لانها تدرس اميه ودايمن تضبطني وتلبسني وتكشخني
ونروح سوى وكنت اجلس با الصف مع الحريم الكبار واحيانا اطلع با الساحه استكشف المدرسه
ناسيه وينها المدرسه الحين هههههههههه ابسئل امي


5- موقف ما زال في ذهنك ..؟ ( سعيد أو حزين )

موقف حزين كنت احب اقوم الصبح واسقي النخله اللي ببيتنا

طبعا قبل لا ادرس وجتني احد الايام اختي الكبيره وكنت اسقي الشجر الصبح

اتوقع كان يوم خميس او جمعه لانها تدرس وشفتها تبكي انا ماسئلتها وش السبب

لاني منصدمه ان اختي الكبيره تبكي >>> كنت اتخيل الكبير مايبكي

قالت لي بصوت يقطع القلب والله جدتي ماتت وراحت دخلت داخل وعلى طول تركت الماء ودخلت با البيت

لقيت اهلي كلهم با المجلس دخلت وهم ساكتين اناظر فيهم ابي احد يسولف يقول شي مافيه

استغربت الموقف اول مره يصير معي ومع اهلي واخواني المشاكسين ساكتين

جلست معهم امي وابوي جالسين بجنب بعض

واشوف الدموع على امي وابوي وجهه متوتر وكان عندهم كرتون منديل

مدري وش اسوي انا ماكنت فاهمه حقيقة الموت يمكن مشاعري عادي رحت وخذيت منديل
ورجعت مكاني واحط المنديل على عيوني قامت امي وابوي يناظرون فيني ويضحكون من موقفي الطفولي يمكن خففت شوي من حزنهم ههههههه

الله يرحمها يارب

6- أعز صديق لك ..؟ ومن أي دولة ..؟

اختي الاكبر مني بسنه انا وياها يسموننا التوأم دايم مع بعض



7- أصدقاء الطفولة هل مازلت متواصل معهم ..؟

كان فيه بس اخفتهم الظروف > زواج


8- كنت تحب تلعب مع البنات أم الأولاد .. أكثر ؟

تبون الصراحه مع الاثنين دايمن العب مع العيال والبنات سوى
وما كنت افرق هذا بنت وهذا ولد عادي عندي الوضع لدرجه اني اقوم واضرب الولد اللي يخطي

لا عصبت والله العظيم اركض صوب الولد من بعيد هو يشوفني مثلا جايه طياره له يقوم ينحاااااش ههههههههههه




9- أول صفعة في حياتك .. وش سببها ..؟

الحمدلله مافيه صفعه جتني بحياتي ابد من اهلي

لكن اذا اخطيت كان فيه توبيخ بسيط كلام بس


10- أفضل لعبة ..؟

افضل لعبه ماراح انساها لموقف
امي وعدتنا لاخلصنا امتحانات انا وخواتي تودينا لدينا طفل السعيد >>> كان حلمي ادخله المحل هذا

المهم خلصنا اختبار وشكل امي نست الوعد ورحنا ذكرناها

قالت خلاص بس اول شي ابيكن تنظفن الحوش كلكن هههههههههه

نظفناها خليناه يلق ورحنا للمحل فرفرنا فيه كل وحده لها ذوقها حنا 3 المهم اختي اللي اكبر مني بسنه

خذت عروسه دبيه شعرها شوشه الظاهر مالقت عروسه حلوه عندهم واستغمضت لاتجي البيت ومامعها شي

واختي الكبيره خذت بسه ( قطوه) له اصوات

وانا وش تتوقعون خذيت .. خذيت بيت كامل فيه مطبخ ومواعين وكراسي وحوسات كثيرات

عشان كذا مانسيت اللعبه هذي


11- أحب مكان تتنزه فيه ..؟


حديقة عبد العزيز نسميها كذا دايمن نروح ونلعب
وحديقة مشار بس نادر مانروح لها الا لاجونا اقاربنا


12- أفضل فلم كرتوني ..؟

افضل فيلم كرتوني فيلم من ديزني >>> اخس متطوره الاخت هههههههه

وربي امي الله يخليها جابته لنا بشريط فيديو كان مترجم با المصري

هو عن الاميره والاقزام السبعه وكان من بين الاقزام واحد اسمه دؤدؤ هذا عبيط ومايفهم
وكانو يستحقرونه الاقزام وكان خجول من الاميره

قعدت ادوره با النت مالقيته اختفى ودي اي واحد يعرفه ياليت يرسل لي رابطه

كانت لهم اغنيه الاقزام السبعه يشتغلون با النهار با المنجم وكان تعب عليهم ويغنون عشان يونسون انفسهم

واغنيتهم

اندؤ ( يعني ندق يدقون الصخر )

اندؤ اندؤ لما يجي الليل واللأماس بيلمع وبيبرؤ ( يعني يبرق )

احسن من مية مره من لؤلؤ

والرزق على الله يا دؤدؤ اندؤ اندؤ ادؤ



13- هوايتك في طفولة ..؟

اللعب وبس كان كل تفكيري وهمي العب وامرح وبس

14- حلمك الطفولي ..؟

البس فستان مثل افلام الكرتون مثل ليدي


15- مطربك المفضل ، أغنيتك المفضلة كـ طفل ..؟

ما اعرف المطربين والاغنيه المفضله طيري ياطياره طيري كنت اسمعها الصبح با التلفزيون

با احد اقنوات >>> متطوره ههههههههه

16- إذا عادت عجلة الزمن للطفولة .. ما هو الشيء اللي بتغيره ..؟


ما اغير شي ياليت يعود بي الزمن على نفس مشاكستي ومغامراتي وبرائتي

17- صف طفولتك باختصار ..؟

طفولتي اولا عشتها كلها ولا انحرمت من اي شي
كنت مدلعه واي شي ابيه يتحقق لي صحيح فيه صعوبات لكن الا يتحقق لي من عنادي

بريئه جدا جدا لدرجه اني العب مع الجنسين البنات والعيال والله ماكنت اميز بين احد منهم
اعبرهم اطفال مثلي وبس



18- إذا ما عندك مانع حط صورتك وأنت طفل ..؟

صورتي بكل سنوات عمري لي صوره ياقهر البلهوث خربان والا نزلت لكم وعمري خمس شهور





... انتهيت ...

واتمنى اكون خفيفة عليكم


طابت اوقاتكم بكل خير


.. واشكرك هايدي الحبوبه مره ثانيه وثالثه ومليووووووووووون ع المواضيع الممتعه