كانك تبي تعرف حبيبي غلاتك
باشقّ لك صدري كرامة واوريك
تبغى علومك ؟ ذي علومك وجاتك
بخير عايش في خفوق ٍ يداريك
فيه الغلا لحافك وشوقه مباتك
نام و تطمن مابه احدن حواليك
الجو ماطر فيه وازهر نباتك
يسقيه من طهر السّحايب و يسقيك
يسقيك حب ٍ وانت يالروح هاتك
هاتك تبيه العمر كله ونا ابيك
القلب يعشب حبّ لاحمت وطاتك
ويقفز جبل لو جات ريح ٍ لا راضيك
قلبي حِماك ودمّ قلبي حُماتك
اسرح وامرح يالغلا في بواديك
ارقّ الرّجوم ومن ضلوعي عصاتك
وعروق جسمي لك قصيدٍ يسلّيك
مابه سواك وشور عقلي . حلاتك
ما تمرّك الضيقة وروحي بكفّيك
بنيت لك قلبي وطن من صفاتك
محمي , عزيز , وشامخ ٍ شوف عينيك
لك مملكة ما كنّه إلا سماتك
طهر وْ وفاء عمَّر بيدينه مبانيك
ياللي فلا ذات ٍ مثل طيْب ذاتك
ماهو بنا مْزكيك , ربّي مزكيك
قلبي فنالك ثم حيابك وماتك
وعوّد حيا ثم مات ثمِّن حيا فيك
اعطيت لك قلبي مسوي , سواتك
وعمري عسى انّه بس ياليت يكفيك
لله درّك حافظ ٍ لك وصاتك
ولا أنت ما يحتاج باذن الله اوصّيك
ادعي بصلاتي لك . وتدع ِ بصلاتك
يرضى علي الله والله يرضيك
و يزيدك الحسنات , أو سيّئاتك
اكبر خطاياك الطهر في مواضيك
لا مرّني طيفك من اربع جهاتك
تضحك لي الدّنيا ونا معْك أحاكيك
اشمّ روحك وآتحلوا حلاتك
وراسك على صدري اضمّه وادّفيك
ويلا ذكرت الموت يطري شتاتك
ابكيك ويالله يا عساني فلا ابكيك
ابغيك بالدنيا غناتي غناتك
والجنّة ابغى ادخل لها ممسك ايديك
إن متّ قبلك بس عطني عباتك
ايّات شيء ٍ منْك لا صرت ما اجيك
وإن متّ قبلي متّ انا مع وفاتك
بنزل معك للموت حالف ما اخليك
بغيت تعرف يا حبيبي غلاتك
وشقّيت لك صدري علشان اوريك
إهدآء خآص 
أتمنى ان يرتقي لذآئقتكم 
لقلوبكم كل الوود 
العضو الأكثر نشاطاً هذا اليوم 
العرض العادي
