كلميني ..
عن ولَه قلبك علي
إرضي غروري
طمنيني إن غيابي
مرّه يَفْرق
لا ولا يشبه حضوري
حتى لو بالكذب قولي
إن قلبك
يفتقد فالظلما نوري!
طالبك
إرضي غروري!
قولي :
تدري..؟!
ما تزيّنت بعدك
ولا أدري وين روجي
ولا كحلي زار رمشي
ولا شمّتني عطوري!
ولا فتّح فوق شفاهي
من بعد ما رحت
جوري
ولا طالت لي جديله
ولا قصّت من ظفايرها الطويله
من بعد ما رحت ..
ليله!
بس أغصان السهر
كانت افبُعدك تطول
لين غطّت كل سوري!
قولي :
والله في غيابك
كنت ميته..
وأنا حيّه
وكل شي يسقيه قربك
في غيابك..
صعب ريّه
حتى لما ..
أجي أكتب لك رساله
ألقى كلماتي عصيّه
ناشفه من الجفاف
وقاحله حتى سطوري
قولي :
بَعدك يا عيوني
يابسه بعدك جفوني
وكنت أموت مليون مره
من هواجيسي
وظنوني
وكنت أقول لا يكون ناسي
أنه هو بس الوحيد
اللي من مزنة حنانه
يرتوي الظما بزهوري
كلميني
طالبك أرضي غروري
قولي تعّبني غيابك
ومن كثر ما اشتقت شفتك
أنا أقصد
أتخيّل إني شفتك
واصرخ بفرحه:هلا بك
وكم مرّه ..ألقى نفسي
واقفه قدّام بابك
قادني شوقي لهواك
وجابني من غير شعوري
كلميني
قولي :
يا قمرة حياتي
في غيابك
ما طلعت فـ الليل قمره
ولا طلّت شمس بكره
وما نبت عشب بخفوقي
ولا ندّى غيمي قطره
ولا مرّت على بالي
أي فكره
إلا فيها شي عنك
أي طاري لك في بعدك
صار عزاي
حتى لو هو كان عاجز
إنه يجبر لي.. كسوري!
كلميني عن هواي
كلميني عن غلاي
عن وله قلبك علي
وارضي غروري
العضو الأكثر نشاطاً هذا اليوم 
العرض الشجري
