في غيابك ..
إنطفى صوتي وانا اناديك .. إسمَع..!
كثر ماني في غيابك حايرة .. أحتاج ترجع ..
بس لاترجع عشاني ..
كون في هذي أناني ..
إرجع لأنّك تعبت من الغياب و من بعادي ..
إرجع لأنّك فقدت اللي بكل ليلة يتوه بصمت ، و بـ صَمْته ينادي ..
قلبي اللي من عرفته ماخذلك .. و ماتوَانى ..
إرجَع لأنّ الحياة اللي بدوني توجعك .. بس لاتوَجّع ..!
تدري إنّه من تعَبك يضيق كوني .. و الوجع بيّ يْتفَانى ..!
تدري إنّي خفت من حُبّك .. و حبّيتك و عشتك ..
خفت .. لكنّي تشجعت و عشقتك ..!
ذنبي إني بالهَوى ياسِيدي طعتك ..؟!
راضية بالذنب و يديني تعَرفه .
ماضية فـ البعد و عندي للأماني في خفوقي ألف صرفة ..
كان ودّك ترجع .. إرجع .. وكان يغريك الغياب إبعد لأبعَد ..
بس أبي تعرف حبيبي .. مهما تبعد .. مهما تبعد .. قلبي لك دايم مشَرّع ..
قلبي يستنّاك ترجع ..!
أنا مَ اقدر ..
أشوفك منفَذ لروحي ولا أعبر ..!
ولاأقدر ..
تحاصرني طواري حبّك الأعذب .. تفيض بـ شِعْري و صوتي
ولا اشتاقك .. ولا اتذكّر ..!
إذا لك قلب عَدّاني .. و تناسى الودّ
فـ انا قلبي بكل ليلة .. يسافر بي ..
لموعد لمّنا صدفة .. لـ شوق و حزن مااعَرْفَه ..
لذكرى عاشت بجوفي .. إليييين طيوفك و خوفي ..
من الغيبة و من بُكرى ..
يا أجمل درب ..
أنا لي قلب .. تَوّهني فـ متاهاتك .. لآخر حَد
يا سيد الجرح و الذكرى
عبَث كانت ايادي الجرح لي تمتدّ
عبَث كانت ليالينا تحيك البُعد ..
عبَث كنت اكتم اشواقي .. واغطّيها ..
وتفوح من النواظر كلّ أمانيها ..!
ومهما بغيبتك تسري و تتركني ..
فلا والله عن عيونك أبد مااصدّ ..
انا ف غيابك تخليت عن صوتي ..
انا ف غيابك تجمّلت بـ سكوتي
ياسيد الصمت ..
علّمني ..
إذا العبرات خانتني .. إذا تألّمت
لمين أشكي على روحي .. من جروحي
لمين أحكي .. إذا انته غبت ..!
ياسيد الصمت ..
يا روحي ..
انا من صمتك تعلّمت .!
ياليالي ..
والمدى ضجّة حنين و همهمات شعور يستدرج رجوعي .!
و مقعدٍ خالي وِشَى لي ..
بالغياب اللي خذا منّي حضوره
وانزوى عن باقي أحلامي و أهداني : خضوعي ..
و انكساراتي ، وصوت الجَرْح في مطلع سؤالي ..
وش بقى لي جد منّك ياليالي ..!
غير حزني ،
وانطفاءات المسرّة فيك ، فعيوني ، و شموعي
هو صحيح إنّه ظلامك خان صبري فيك ، و أغواه احتمالي ..
ياليالي ..!
و ليه إنتي ياليالي لا جمعتينا عجوله .!
ليه كل اللي نحبّه صدق .. مانقدر نطوله .!
من متى و اللي يدوّر عن إجابة
لاسْئلته اللي تطير بنومه الهاني لقاها..!
ومن متى الأشواق ما طوّل مداها ..!
وليه شارع ضمّنا بشويش .. كان الكلّ حوله
صار خالي ..!
هي قويّة صدّة اللي مايبالي ..!
أو كسيرة دمعة الحزن الخجولة .!
ياليالي ..
مابقى من الذكريات إلا قصيدي والتساؤل ..
اللي أرهقني هطوله ..!
و بحة الصوت الكسير اللي يغنّي
في حضور الهَمّ و أنوار المدينة ..!
[ ليه أحسّ الكون في غيبتك فاضي ..
وليه أحسّ إنّ الفرَح ماله أراضي ..! ]
وليه بغيابك تغادر راحة إيديّ الأماني ..
والجفاف يضمّ صوتي ، وابتهالاتي الرصينة ..
وليه بارت في غيابك ، ألف أنشودة حزينة ..
وليه أسمعهم يعيدون الحكايا .. والنهاية نفسها في كلّ ليلة:
من غيابه : ماتت البارح بقايا ياسمينة ..!
من غيابه : ماتت البارح بقايا ياسمينة ..!
العضو الأكثر نشاطاً هذا اليوم 
العرض الشجري
