على أمرك يابعد نبض الخفوق وهاجسي ومناي
مدامك ماتبي وصلي أنـا وش عـاد بيدينـي
أبحفظ مابقى لي من كرامه وأستحـث خطـاي
على درب الغيـاب وويـن مـاودى يودينـي
واذا هفهف على صدري هواك وحدني لاقصاي
دعيت الله يطمن فـي بعـادي قلبـي وعينـي
وطلبته مثل مامكـن غـلاك وثبتـه بحشـاي
يشيله من معاليقـي قبـل لا الوجـد ينهينـي
ولعلمك لو عرفت إني أبثني عزمك برجـاوي
أمـوت ولا ترجيتـك وقلبـك بايـرٍ فيـنـي
لو انك قلتها تبغـى تشـوف معزتـك جـواي
أو انك قلتها ساعـة زعـل والذنـب كاسينـي
لاجيك بكل حيلاتي من ايام الصبـا لا تـلاي
وأشري رضاك لو كان المقابل باقـي سنينـي
ولكن مالمسته بك قتل حتـى العتـب بشفـاي
غرام ٍ مات في عينك علـى فرقـاك يغرينـي
حسافه كنت احسب انك تقدر طيبتـي ووفـاي
وعلى اقل احتمال تراعي اللـي بينـك وبينـي
توقعت إنك أخلص من عرفت وشفت في دنياي
أشك بكـل مـن حولـي ووحـدك ماتخلينـي
طلبت البعد في وقت أبيك تكـون بـه يمنـاي
بعد ماجارت ايامـي علـي وحـارت يدينـي
ولايخفاك لوعات الليالـي وماحصـل ويـاي
ولو مافي يدك حاجـه جـودك كـان يكفينـي
توفي لو بعض دينك إلين آقف علـى ماطـاي
لعل يكون لي صبـر ٍ علـى الفرقـا يقدينـي
على كل حال ماينفع كلامي لـك ولا شكـواي
عن اذنك برحل لدرب الغيـاب اللـي ينادينـي
(منقول)
العضو الأكثر نشاطاً هذا اليوم 
العرض الشجري
