انتي بكف وباقي الخلق في كف
متعليه في وسط قلبي ولك شان
في غير وصلك مالقلبي ترى شف
محتاج لك يانور عيني وشفقان
لا جابوا اسمك صرت انا تقل مختف
مالي على نفسي الى اطروك سلطان
من غير حبك غضت عيوني الطرف
ياللي جمالك صار للزين عنوان
اريد انا قربك ترى ياغذا الحرف
وان ماحصل موتي ودنياي سيان
------------ --------- --------
((حبيبتي ))
حبيبتي لا مـن غديتـي لـي سـراج اتبعـه
وكني غديت من الظما اركض ويطردني السراب
لا تبخلين اليا شربتـك ماشربتـك مـن سعـه
دامي من جروح الهموم الموجعه كلي صـواب
اليوم مرتنـي السوانـي والفصـول الاربعـه
اليوم مريـت الموانـي والمبانـي والسحـاب
اليوم ماكنـي لقيتـك مـر صوتـك ماسمعـه
اليوم ما كني فقدتك مـن سؤاليـن وجـواب
يابنت في خدك وهج سيل الشمـوس الساطعـه
احرق بداخل داخلـي انسـان ماهـو للتـراب
واللي خلق ظلـم الليالـي بالعيـون الهاجعـه
اني من الحرمان اتسائـل وحرمانـي جـواب
يوم الـوداع تخيلـي مالـي حبيـب اوادعـه
محروم انا وتخيلي محروم حتى مـن العـذاب
يابنت لـي قصـه تطـول بكلمتيـن موجعـه
هي باختصار اني انا اركض ويطردني السراب
----------
حبيبتـي كـل الـعـواذل تشـابـه
قلبٍ ظلام ووجه يشبـه للأصحـاب
ولامن غدى لك صاحبٍ ينحكـى بـه
لا تسمعين ان كان لك قلب وأحبـاب
الى مشيت الـدرب يلهـث سرابـه
والى سكنت الـدار نادانـي البـاب
وشلون أنـام وهـم قلبـي صوابـه
والشوك ينبت بين جفنيـن وأهـداب
تعبـن أمنّـي الأسئـلـة بالإجـابـه
وأنطر شروق الشمس والشمس بغياب
وتعبـت أناظـر والمعنـى عـذابـه
انك بعيـده والمـلا دونـك حجـاب
أجمع كـلام ومـا أعـرف الكتابـه
وعندي شعورٍ صدق والوقت كـذاب
وكل النجوم إلى أمطرت من سحابـه
حبيبتي دمعك جـرح قلـب وتـراب
واللي وقف مـا بيـن بابـي وبابـه
قلبه ظلام ولابسٍ ثـوب الأصحـاب
------------ --------- ---
(( بعض احوال ))
أنا مقدر أكون اني حبيب في بعض أحوال
أنا كلي أجي والا أروح بعزتي
كلي تخيرت الفراق وما دريت إن الفراق وصال
أقول اني نسيتك بس مدري كيف تاصل لي
خذاني لك سؤال في عيونك و الجواب محال
خذاني منـــك دمع في عيوني مارضى ذلي
رحلت انت وتركت بداخلي طيفك و صبر طال
غدت ذكراك شمس ما تغيب و صورتك ظلي
حكيت و مالقيت من الحكي الا الـندم موّال
سكت ومت بالحسره ولا ادري وشهو احسن لي
أحبــــك كل ما فيني يحبك يا خلي الــبــــال
تخيلتك دواي و صرت جرحي الصعب يا خلّي
تعبت أرحل مع وجيه البشر بانساك بالترحال
و لا ادري وش يجيبك في وجيه الناس واهلّي
------------ ---------
كنت احسب اني عرفت الحب قبل اعرفك
وعشقت قبل اعشقك واشتقت قبل التقيـك
وكنت احسب اني لقيت احباب قبل اوصلك
واثري توهمت في غيرك وانا كنت ابيـك
تعال نعطـش وتشربنـي وانـا اشربـك
تعال قبل الوعد اجلـس معـي نحتريـك
تعال شفنـي وانـا استنـاك كـم اشبهـك
يطري علي الف راي و راي واحتار فيك
اجي مكان الوعـد والا اسبقـه انطـرك
والا آخذ الموعد اللـي يحتريـك واجيـك
يا آخر الحب ذقـت الحـب فـي اولـك
ويا اول الشوق اقصى الشوق ما ينتهيـك
علمتني كيف اعرفك لين صـرت اجهلـك
ضيعتني فـي متاهاتـك وكنـت ارتجيـك
حبيـب الاحـلام يابـعـدك ويامقـربـك
حـرام يكفـي تبعثرنـي وانـا احتويـك
ان شفتك بحلـم صدقتـه وانـا اتوهمـك
وان شفتـك بعلـم كذبتـه اليـن انتشيـك
اخاف اغمض عيوني وان رمشت افقـدك
واخاف افتح وتصبـح حلـم ولا التقيـك
------------ --------- ---
((بعد حيي))
اليوم يا بنـت مـن زيـي
الشمس واردت على ضيي
جيت انتخي بالوجيه البيض
يا عزوتي يـا بعـد حيـي
الجادل اللي حلاهـا غيـر
ضيعت في شمسهـا فيـي
بعيونهـا سلسبيـل رمـاح
والموت بالسـود متهيـي
موت وانا اموت انا بالموت
كثيرهـا غـرق شـويـي
لا قلت تكفين قالت جـاك
وان جيتهـا فجـأه تعيـي
ولا قلت مالي و مال الغيد
قالت وهـم بينهـم زيـي؟
وان قلت انا تبت مالي كار
مقفي زمانين عـن غيـي
قالت وهي تلتفـت للنـاس
طلال موتـه علـى يديـي
------------ --------- ---------
((قالت قدر))
قالت قـدر و أقـول يومـك تبينـي
غصبن على الدنيا يدك فـي يدينـي
لا تظلمين الوقت وش ذنـب الأيـام
لا تظلميـن الـحـظ لا تظلميـنـي
غديت مابين ارجـا فيـك واليـأس
هـذا يبـي منـي وهـذا يبيـنـي
إن قلت شمت وخاطري طاب كذاب
وان قالت أبيك ارخصت نفسي بعيني
خيرني أمري بين أصعـب خياريـن
موتي أنا أو موت الحسـاس فينـي
لكن زمانـي المـر علمنـي أنـي
أموت محني لجـل قلبـي جبينـي
والله ما تلقيـن حبـي مـع النـاس
روحي وهـا لأيـام بينـك وبينـي
العضو الأكثر نشاطاً هذا اليوم 
العرض الشجري
