جنون انتحاري

ياعين لو ضاق المدى وادمس الليل=لايوجعك همٍ السهر والمساري
لوكان في قلب العنا تركض الخيل=والله لا اخذ من شقا الوقت ثاري
بطالع الجوزاءعلى شرفة سهيل=وانفض عن الكاهل جيوش الطواري
اليا متى اجمع من الهم واكيل =بطعن ظروفي في حدود الشباري
دنيا نسايرها غياب ومواصيل=لاشك ماعاد الامل باختياري
قلنا نشيل الشيل ونصادم السيل=واليوم ماهو في يديني قراري
تنزف جروح السالفه والغرابيل=تاخذ من افكاري وتتبع مداري
قريت وامعنت النظر بالتفاصيل=وعشت السلام وعشت ذات الصواري
غموض يرميني بياضه على النيل=متزملٍ بالحزن والحزن عاري
صمتي يسولفني قصيد وتراتيل=والبرد يشعلني على جال ناري
في معترك ما للوفا فيه تبجيل=كتبت له ذنبي بنص اعتذاري
قلبٍ يبي من غلطة الوقت تعديل= يضيع صوته بين كاتب وقاري
طموح يرسم للاماني عراقيل=خايف وفي صدره جنون انتحاري
وانا لو ان الهم صفق له الويل=مايشهد التاريخ يوم انكساري
شامخ ولو غنى عدّوي مواويل=ابقى ويسمو مع سمّوي وقاري
عبّرت تعبير الندى للاكاليل=شعرن يوصلني لرد اعتباري
يطير في جوي فراش التعاليل=وانا بسوق العز بايع وشاري
نرسل بصدق الشعرنص المراسيل=مورث بدوٍ لاقريته حضاري
نكتب ونرسم فكر ونثقّف الجيل=ونفرق اصيل المفرده والتجاري
في عالمٍ كله مجامل وتطبيل=فيه الهبوب العاتيه والذواري
بس العمر مافيه مهله وتأجيل=لوكان طاولت الزمن بانتظاري
لابد بعد النور يجتاحك الليل=وتبدا تنادي ياطويل المساري