وصف الجيب

بسم الله الرحمن الرحيم

الشاعر\ مشعل عسام التريباني الشمري

( وصف الجيب )

راكب اللي يطوي القاع مايمشي رويــــد (1) جيب لاندكروزتوه من المصنع شــــــروه

صمموه اخصوص من شان للدرب البعيد (2) اشهد انه يرفع الراس للي صممـــــــــــوه

تقل مفرع خفرت فرعت في يوم عيـــــــد (3) عيطموس والشعربافخرالطيب امشطــــوه

يم يهرف تقل ذيب لحق ربع مديــــــــد (4) جايعن واهل المواشي عن الضين اطردوه

وان وقف تقول شيخ يخدمونه عبيــــــــد (5) بس يشر في يمينه وماقال عملــــــــــــوه

للخطروالبعدصمم وتصميمه فريــــــــــــد (6) بوصله هزاز سفتي بكلش جهــــــــــــزوه

وكن زيكه يوم يلمع صقيل مع عنيـــــــــد (7) سله القاطع على جمع قوم حاربــــــــــوه

ماخسر من يدفع المال بالجيب الجديــــــد (8) اشهد انه ماخسر من دفعع به لعن ابـــوه

لعن ابوه الجيب حاكم على الاسيادسيــــد (9) ابدعو في صنعته لعن ابو من صممــــوه

ان رقيت الظلع يتقل يمشي مع صعيــــــد (10) والنفود يفزبه لو الدبل ماعشقــــــــــوه

بارد بالقيض دافي الى حل الجليــــــــــــد (11) ياهني من يركب الجيب واللي يملكــــوه

لاتغالون الثمن في مركبه ياهل الرصيـــد (12) ادفعو بالجيب لوزاد الثمن فيه ادفعــــوه

يوم يمشي بالوعر تقول بالرجلين قيــــــد (13) ايتهزع كنه اللي بالاغلال قضبــــــــــوه

وان مسكت القارتلقاه بالممشى يزيــــــــد (14) كنه الزورق بوسط البحر يوم ارسلـــوه

هوخوي الطيب اللي زها فيه القصيـــــــد (15) لانخوه لدرب صعب يهقوي من نخــــوه

هو تقل حرطلع بالعين شاف فروق صيـد (16) يوم شالو برقعه وقت الهددثم اطلقـــــوه

يعتلي بالجو ثم على الصيده يعيـــــــــــــد (17) صيرمي صاروم ساطي وفعله جربـــــوه

ول ياللي من كثير المال مانته مستفيـــــد (18) انتفع بالمال قدام الزباين ينهبـــــــــــــوه

مالك الا ماتصدق فيه والاماتبيـــــــــــــــد (19) لارحلت المال يصير ملك اللي خـــــــذوه

اشهد ان اللي يقصر على نفسه قريــــــــد (20) ودك ان اللي بخل بالمال منه يجــــــردوه

قصيده مميزه وراقيه
مبدع
ما ننحرم جماال حرفكـ المميز
كل الود

صح لسااانك ملايين
شاعرنا الراقي \ مشعل التريباني
على الابيات الرائعه والعذبه
يعطيك الف عافيه
ولاهنت ,,

الله الله عليك

قصيده راائعه بروعه حضورك

سعدت بمعانقتها

سجل اعجابي

صح لسان ولا هان شانك

ابيات روووعة

ربي يعطيك العافية

تحياتي لك ..

صح لسانك ماننحرم من عطائك

شكراللجميع على المروروالاطرى الله لايهينكم

يعطيك العافية

واشكرك على هذا الابداع الاكثر من رائع
واتمنى ما ننحرم من جديدك
تقبل مروري

مشعل

صح لسانك وعلا شانك

ابيات جزله لاهنت..

الاخوان الكرام
الخيالي
كبريا شمر
شكرالكم على المرور والاطرى الله لايهينكم