اوبريت كبرياء الخليج كاملاً ..

الله يحيي من عنى لديارنا
يا مرحبا..يا مرحبا..يا مرحبا
أهلاً بأغلا خطوه جابتكم لنا
يا مرحبا..يا مرحبا..يا مرحبا

اليوم يا ناس ما اقول بغلا
إلا هلا
يا مبخر الحي زد عودك شذا
زيده شذا
قم نفرش الفل بدروب الملا
يا شاعري غن مع هذا وذا
يا مرحبا..يا مرحبا..يا مرحبا

بـ أغني للدنيا وأدق دفوف
من قدي دام اهلي علي ضيوف
وبكف بنتي بـ أنقش الحنا
والبّس عيالي دقل وسيوف

غّن بطرب..من يقدر يلومك
يا كايد بْاحبابك خصومك
غّن..وانا لضيوفك أغنّي
وأطرز القمرى على هدومك
قوم يا نهام غّن
ستة أوطان بوطن
خط يا تاريخ وإشهد يا زمن
إرفعوا شراع الدقل
للخليجي اللي وصل
هذا أصل الطيب مع طيب الأصل

يا مركبٍ جمع الغالين
سبحان ربٍ رفع شانه
جب لي الكويت وخذ الثنتين
عيني وعيني على شانه
قوة يا راعي السيف يا كويتي
تشيلك عيوني قبل بيتي
بسيوف جابر يا هلا
بأين من عيوني الغلا
قلبي من الشوق يا كويت امتلا
والشوق من يقواه
يكتب وانا أقراه
الديره اللي نورها ضافي
شمسٍ تشع..وحضنها دافي
الغادة اللي همّها
تعطي..ولو من دمّها
(سدرة هل الخير)تكفى سمّها
لو ما وراها جبال
كم دونها رجال
انا الكويت ومنزلي عالي
بالعلم والإيمان وعيالي
يا رب كم يمكن بقي
آنا..والاسرى نلتفي
عندي أمل يا ملاذ المشتقي
لكويت مغلاها
ما ننسى أسراها


قوم يا نهام غّن
ستة أوطان بوطن
خط يا تاريخ واشهد يا زمن
إرفعوا شراع الدقل
للخليجي اللي وصل
هذا أصل الطيب مع طيب الإصل
يا مركب جمع الغالين
سبحان ربٍ رفع شانه
يا من يبشرني بالبحرين
وبشارته لولو الدانه
قولوا للغالي
قولوا حياك
حّي من جاني من البحرين
أخوي..وافرش له جفون العين
هذا (حمد) طيبه على محياك
طيبٍ غدى للطيب رمز..وعين
من منامتنا
جانا مرسول
يحمل اشواق الوفا الغالي
يا المنامه..وأنتي في بالي
وشوق المحرق جانا قبل نقول:
وين اللي قدره عندنا عالي
كل تاريخك
عزّ وامجاد
من عذاري يرتوي عزّه
مجد..محدٍ يقدر يهزّه
من كنتي دلمون..ديرة الأمجاد
خذني للولو
خذني للغوص
خذني صوب النوخذه..يا الله
من يدل العزّ..يوصل له
سولف لي عن ماضي هل البحرين
اللي حموا هالدار بإذن الله

قوم يا نهام غنّ
ستة أوطان بوطن
خط يا تاريخ واشهد يا زمن
إرفعوا شراع الدقل
للخليجي اللي وصل
هذا أصل الطيب مع طيب الأصل
يا مركب جمع الغالين
سبحان ربٍ رفع شانه
أرفع بيارق قطر هالحين
جت دوحة المجد..وأغصانه
هلا وغلا باللي يفاخر به حمد
ولد قطر يانا مثل ويه السعد
يايب لنا صوغة ويا صوغة قطر
سلام أحلى من الشَّهَد..وأصفى بعد
النعم تحري به من الماضي قطر
أرواح أهلها غيم..ويديهم مطر
إرضٍ لها بالمجد شطين وبلد
لو يستغيب الغيم ما غيرك نطر
لو تعرف الدوحة كثر حبي لها
كان اقبلت..ما حملتكم حبها
وان كان جات الوكره ببروق ورعد
دار الرجال اللي تعلا قدرها
يا دار من لا عاهدوا..قول وفعل
أشجع من السهم السليط المشتعل
بدوٍ كرام..وحضر موفين العهد
ماكر نداويه..هل النوق الشَّعِل

قوم يا نهام غنّ
ستة أوطان بوطن
خط يا تاريخ واشهد يا زمن
إرفعوا شراع الدقل
للخليجي اللي وصل
هذا أصل الطيب مع طيب الأصل
يا مركبٍ جمع الغالين
سبحان ربٍ رفع شانه
وان جت لامارات ملح الزين
قلبي جمع شمل خلانه
أرمس بلهجة هلي
مرحباً يا عيال زايد
بالله مو باين علي
احتري وملهوف وايد
يا إمارات الأمان
ديرة تشبها الأماني
سابقت حتى الزمان
واسبقت حتى الثواني
لاهلها عندي مكان
فوق ما تصور خيالي
بس عاشرهم عشان
تعرف اش فرق الرجالي
طيبهم ورث وعوايد
جود..ومجاراة كايد
ومن نشد..يلقي ولاهم
زايد بزايد لزايد
بو ظبي دار الكرام
عزّها لايق عليها
جت تشاركنا الغرام
تمسك إخوتها بيديها
ومن دبي جانا سلام
ديرة رجال المعالي
ودام عجمان بسلام
لو مدحنا ما نبالي
وادر..يا كل الغمام
شارقتنا دار غالي
واثر في العين الكلام
ودوم رأس الخيمه عالي
من شواطيها القدام
لي شفى ربع الخوالي
كلها ديار كرام
وش نخلي..وش نوالي

قوم يا نهام غنّ
ستة أوطان بوطن
خط يا تاريخ وأشهد يا زمن
إرفعوا شراع الدقل
للخليجي اللي وصل
هذا أصل الطيب مع طيب الأصل
يا مركب جمع الغالين
سبحان ربٍ رفع شانه
قل مرحبا..وبعمان أهلين
يا شاعري غنّ..وادانه
أهلاً هلا بك..ويا حياك
فارس..شهم..قدوته قابوس
يا عمان..يوم الكريم أعطاك
شعبٍ..من الجود..كله روس
تعلم المجد مشي خطاك
لاعلى القمم..والدروب دروس
مسقط:علم..فوق راسه نار
لرجالها بالمعالي..دور
واذا طلبت الصخى بظفار
عطوك اهلها جبال النور
وبأهل صلاله يا حظ الجار
والنور لعمان شط..وسور
من مثلها يزرع الإنسان
بالعزّ والطيب والتقوى
يا عمان لك بالحضارة شان
ريح اللبان انعش الحلوى!
لو يسأل الماضي الوديان
كان الصدى..ردّد النشوى
ما بقي من عروق قلبي إلا أنت
قلّي وصفك..يمكن أعرف من هو أنت
أنا اللي يسقي الجود جودي
أنا..أرضي أطهر هالوجودي
والغيم يتعلّم صعودي
أوفي..قبل تسمع وعودي
وأنا كل ما حولي شهودي
سيفي وأقلامي وسجودي
أكيد أكيد...أكيد سعودي
وينك يا أبو نواف
يا فيصل الإنصاف
حاضر..ولا تنشاف
وينك؟؟
مرحوم يا سيف السيوف
يا ليت لك عينٍ تشوف
وشلون طوّعنا الظروف
لوصاتك رجالك وقوف
سلام يا ديرتي
أبلمس الشمس بأصباعي..واقوم اكتب
أبكتب عالسما إسمك
واخلي النور ما يغرب
واكتب لك على كل الكواكب مجد لك
وأحسب
وأعيد اكتب..
وأعيد أحسب..
وأعيد اسهب..
يا دار من يشبهك
والله مالك شبيه
شعبك بقلب الملك
وانتي بقلوبٍ تبيه
والله ما نبدلك
إلا بما نرتجيه
دنّة كريم..لهلك
خِدتم بيته..بتيه
حنا على العادات وصانا فهد
إسمه يكفينا عن وعود وعهد
وان قلت ابو متعب لهمك إرتعد
هذا ولي العهد زيزوم الهدد
وان قلت ابو خالد لعسكرك ابتعد
يحري بكل الطيب سلطان السعد
وان قلت انا سعودي..وأمِّي هالبلد
أقول انا اشهد إنها جابت ولد

يا خليج الكبريا
يا عظيم الانتما
جود محسود بوفا
تعطي ما تطلب جزا
يا مجمعنا سوى
وشامخٍ مثل السما
كلنا نفداك يوم
يرتفع صوت الندا
بالعسر..صبرك صخى
مثل شكرك بالرخى
إنت لك كل الولا
يا كذا..والا فلا


يا خليج..
يا خليج..
يا خليج..