من شبة النار لـــ بن ومعاميل لــ..صوت فنجال يزاحم خويه

يامل قلب ٍ عد حامي يضبه =ضبة مسامير السداد الضبابي

صبري قضى لوهو على ضرع جبه= ولو هو على خشم ام سنمان ذابي

ياكليب شب النار ياكليب شبه=عليك شبه والحطب لك يجابي

والقط لها ياكليب من جزل حبه=وشبه ليامن غفى كل هابي

أبيك لياشبيتها ثم اشلهبه= تدعي لها ربع بعيدن غيابي

تجيبهم لوهو بعيد ٍ مشبه= ولاهم قريبين لنبح الكلابي

سرات بليل وناطحين مهبه=متلثمين وسوقهم بالعقابي

نسرية ياكليب صلف مهبه = ليا نسنست كنها سم دابي

كم واحد ليانسنست يلعن ابه=تغدي عليهم من حساب الزهابي

لياجاظع المنزوع خطو الجلبه=ياحلو طق عصيهم بالركابي

والوالمه ياكليب اعجل بصبه =والرزق عند اللي يجيب السحابي

وانا علي ياكليب ماها وحبه =ودقه وتقليط الدلال العذابي

واحمس علىجمره عن حراق حبه=لياما العرق تشوفه على الحب ذابي

ودقه بنجرن تالي الليل نبه =يشادي لذيب ٍلياعوى براس نابي

ودق البهاروبهره ثم صبه = تصبغ على الفنجال مثل الخضابي

ومن يوجعه راسه ترى الهيل طبه= وليا تقهوى وهاجس الكيف طابي

وخطر ٍ على كبش المربى نجبه = لو زودوا فيه الثمن مانهابي

نذبح لهم كبش ٍ عريض الملبه = ومن حمر السكين نحني الركابي

ومع فنجا ل مزين طبخ حبه = والعذر مع هذا وزين الجوابي

ونبدي لهم ياكليب هرج المحبه = لياجنب الهين عريض العلابي

وبهرج احلى من شخاليل جبه = واحلى من السمن الجديد العرابي

بقلب نصوح ماحكى بالمسبه = لياعرطل الاجواد خطو الهلابي

وخطو الولد لوله زبون وجبه = عاريه على معير الشبابي

عن الطيب عده غارس له بغبه = يتعب على درب الردى مايهابي

والطيب صبر وراعي الصبر غبه=يرقى بروس مشمرخات الهضابي

ومن لاصبر ياكليب في حكم ربه = هذاك يوم البعث ماله ثوابي

يارب ناخذ بادي العمر عبه = من قبل ماينسف علينا الترابي


دغيم الظلماوي رحمة الله عليه