[poem=font="simplified arabic,7,white,bold,normal" bkcolor="black" bkimage="" border="double,10,black" type=2 line=0 align=center use=ex num="0,black""]
آه تيماء عقب فرقاك فيها ضيق بال=والحزن خيّم عليها عقب شيخ الزحول
آه ياغبني على من يشيلون الثقال=وآه ياثقل المعاناة بانْصاف الحلول
وآه من فرقى هل المجد هامات الجبال=وآه من موت المطانيخ ورْجال الفعول
وآه من جرح الاجابه على هم السوال=واه من ليلٍ بهمّه على الفرحه يحول
وآه من طيف التلاقي على فكر الخيال=مانْعَرْف شلون نبدا ولا ندري شْنِقول
وآه من كثر الحسايف مع اوقات الزوال=لاتوشّحها غياب الذي قال ويطول
يابو فيصل آه فَقدك كِسَر صبر الرجال=وانهمر دمع الصناديد في اصدق نزول[/poem]
[poem=font="simplified arabic,7,white,bold,normal" bkcolor="black" bkimage="" border="double,10,black" type=2 line=0 align=center use=ex num="0,black""]
الطيِّب اللي يِقَدِّرْنَا بليا وصاه=اللي مع الكل طيِّب والعرب شاهده
ياقف مع اللي نَعَرْفه دون تكفى وجاه=واللي بعد مانَعَرْفه بالخفى ساعده
ياعل عمره طويل وينبسط بالحياه=مثل انبساط الصغير اللي لقى والده
هذاك ابو سيف عنوان الوفاء محتواه=عِرْق الوفاء في يمينه لا رفع ساعده
حَشَم حَشَم والله انا مالحقنا جزاه=لايابعد من نخيته وَقْفِتِه بارده
والا حشم فزعة اللي مانصاه ونصاه=ابوه قبله علوم المرجله وارده
عمي شفق ياعسى الفردوس تروي ضماه=ياالله عسى منزله بالجنه الخالده
واللي مايمدح ولد عمه على مابناه=عزالله ان الحَسَد عن مدحته راوده [/poem]
[poem=font="simplified arabic,7,white,bold,normal" bkcolor="black" bkimage="" border="double,9,black" type=2 line=0 align=center use=ex num="0,black""]
جبل وادي ونَخْله والحمامة في سماه تْحُوم=طفل يرسم خياله من خيال الحب والطيبه
عَشَق لون الربيع بْدَاخله ما زار عِشْقِه لوم=ولكنه كَرَه خُبْث الوجيه اللي تْغَنِّي به
معه كراسته ما غاب عنها من غلاها يوم=يطالع رسمته في عالم الوحده وتغريبه
تَعَمَّد ما رسم في رسمته فوق الجبال غْيوم=يخاف الغيم يِقْفِي والزمان الشين يِقْفِي به
وتَعَمَّد ما رسم للشمس موقع ياشقاء المحروم=يخاف إن المواقع تَرْبط الواقع مع الغيبه
بَعَد فتره طويله لَوَّن الأسْوَد وحط نْجوم=لأن الليل بِعْيونه سَهَر فكره وتعذيبه
مِسَحْ ذيك الحمامة من خياله قبل وقت النوم=يخاف إنَّه إتْوَقِّع في عذاب الشك والريبه[/poem]
[poem=font="simplified arabic,7,white,bold,normal" bkcolor="black" bkimage="" border="double,9,black" type=2 line=0 align=center use=ex num="0,black""]
يِضِيق الشايب اللي في زوايا غرفته مقهور=يموت الفين مرّه مادَرَىَ به غير مسباحه
يِوَسِّع ضيقته مَوْعِد خذاه لْشُوفَة الدكتور=عَسَى يَلْقَى أحد من صحْبِته يَكْشِف عن جْرَاحه
يبي منهم عَتَبْ يَكْفِيه عن وقتٍ عيونه عُور=يبي ذيك الوجيه اللي مِضَت لو يَرْجِع صْيَاحه
تَلَفَّت مالقاهم والأمل خانه بْضِيم وجُور=رِجَع بِهْمُومه اللي من عذابه مالقت راحه
مِشـَى وقت الضحَى في عَتْمَة عيونه وحزْن النور=بكَى لَـنَّ الزوايا تَحْجِر الشايب مع اشبآحه
دخل رغْم التعب في غرفته والعالم المهجور=وقف لحظة تأمل مع هبوب الصيف ورْياحه
جلس في غرفته ضايق ومن ضيقه وقف مكْسُور=يدَوِّرْ في زوايا غرفته هَمِّه ومسباحه[/poem]
[poem=font="simplified arabic,7,white,bold,normal" bkcolor="black" bkimage="" border="double,9,black" type=2 line=0 align=center use=ex num="0,black""]
إيه شمر واسْألوا عنها المنايا=إسْألوا برزان عن حوض المنيه
إيه شمر بالغضب كِلَّه طنايا=ماتشوف الموت يَقْبَلْهم هديه
لعنبو حي الدهايا يالدهايا=الجنازه لَقّبه بِسْمِه سِمِيّه
إيه شمر تِعْتِلي كل المزايا=إن بَغِيتَه طِيْب والا بالحَمِيّه
إيه شمر لاَعَطَتْ مال العطايا =غير كف الشمري والنار حيه
دولةٍ تِنْصَى وتَنْصَاها القضايا=فوق سطح اليابسه والجاذبيه
إيه شمر بالكرم بِيْض النوايا=طَبْع في شمر وهي بالجاهليه
إيه شمر لااعْتَلو فوق المطايا=تِمْسِي الدنيا وتِصْبِح شمريه
يافهد وقِّف معي كن الحنايا=وَسْطِه الجربان والفارس بْنَيّه
يافهد رَبْعَك مْفَكِّكْت السرايا=سِرْبِةٍ ياطير شلوى زوبعيه
أبو خُوذَه ركن من ركن الهدايا=كيف ماتعطي من اعضائك عطيه
والله إنَهْ تِفْتِخِر فيك السجايا=مثل ماتَفْخَر بحايل حاتميه[/poem]
العضو الأكثر نشاطاً هذا اليوم 
العرض العادي
